To Førde-lag i volleyfinalar

Dermed har Førde to lag i finalane 21. januar, for laurdag vann damelaget til Førde VBK over UiS i Stavanger.

LES: Førde-damene klare for finale

Måtte bruke skadd spelar

I Førdehuset vann heimelaget dei to første setta mot NTNUI 26-24 og 25-20, men då trondheimslaget vann det tredje settet 25-22 valde trenar Frank Kalstad å sette inn kneskadde Mathias Loftesnes.

(Artikkelen held fram under biletet.)

Vann fjerdesettet klart

Førde vann lett det fjerde settet 25-10 og dermed 3-1 samanlagt. Kalstad hadde håpa å sleppe å bruke Loftesnes for at det skadde kneet skulle få kvile, men planen var å sette han inn dersom det måtte til for å vinne kampen.

Det lukkast, og dermed kunne eit talrikt publikum i Førdehuset juble for at herrane kopierte damene, slik at Førde VBK kan kjempe om to cupmeistertitlar i Oslo 21. januar.

Kvalen og Eithun mestscorande

Jonas Kvalen og Geir Eithun vart mestscorande for Førde med 19 poeng kvar. Kvalen gler seg over å ha ein finale å sjå fram til, hans andre for Førde.

– Etter at vi vart slegne ut av nordisk liga er det godt å ha noko i tillegg til eliteserien.

– Kva var grunnen til at de vann så klart i fjerdesettet?

– Då stilte vi med førstelaget, og då sat det mykje betre i blokk og forsvar.

(Artikkelen held fram under biletet.)

– Førde er volleyballhovudstaden

– Førde Volleyballklubb har skapt historie i dag. Eg trur det aldri har skjedd før at same klubben stiller med lag i begge cupfinalane, seier Sindre Roska, som er leiar i klubben.

Akkurat det stemmer ikkje, for i 1979 vart BSI cupmeister både i dame- og herreklassen. Og går vi lengre tilbake i historia så har det skjedd fleire gonger at ein og same klubb har hatt lag i begge finalane.

Men for Førde VBK er iallfall dette historisk og stort.

– Dette er resultatet av eit langsiktig arbeid i Førde starta på 1970-talet av pionerar, og det har enda pr. no med at Førde er volleyballhovudstaden i Norge.

– Vi skal farge Oslo blå

– No blir det busslast på busslast frå Førde til Oslo i januar?

– Ja, vi set oss ned i morgon for å planlegge korleis vi skal farge Oslo blå den 21. januar. Vi hadde håpa at vi kunne få cupfinale i Førde, men volleyballforbundet har bestemt at dei skal vere i Oslo denne sesongen, og då får vi gjere det beste ut av det.

Møter Nyborg og Oslo Volley

Søndag kveld vart det klart at herrelaget til Førde skal møte Nyborg, som slo Tromsø 3-0 borte i semifinalen. Damelaget skal møte Oslo Volley som vann 3-0 over BSI.

LES OGSÅ: Kan få to Førde-lag i finale