Det seier Torill Fjellestad i lesarinnlegget ho hadde på trykk i lokalavisa Firda Tidend i førre veke.
– Det hindrar dei i å vere med på andre fritidsaktivitetar og idrettar. Spesielt blant dei yngste, utdjupar 36-åringen ovanfor NRK.
Ti månader sesong
Fjellestad var ein markant midtstoppar og kaptein for Sandviken frå 2002 til ho la opp som toppspelar i 2010. I 2007 fekk ho sin einaste landskamp mot Japan.
No har Fjellestad ein åtteåring som har to fotballtreningar i veka, ti månader i året – og spelar kampar til seint på hausten.
Ho erfarer også at dei som trenar mest, får mest speletid.
– Det er litt trasig for ein som vil spele både handball og fotball. Eg tykkjer sesongen er for lang, seier Fjellestad.
– Ei utfordring
– Ein kan vere allsidig, og likevel bli veldig god i fotball, seier ho.
Styreleiar i STIL-fotball, Sjur Gimmestad, er usamd i at fotballen krev for mykje tid.
– Tilbode er der, men ungane kan velje om dei vil nytte det eller ikkje. Ein niåring må ikkje stille på begge treningane i veka for å vere med, seier han.
Etter lesarinnlegget kalla han det sportslege utvalet inn til møte. Dei svara med eit lesarinnlegg i lokalavisa.
– Vi konkluderte med at det er ei utfordring for foreldre og ungdom i Gloppen å gjere ei prioritering når det er så mykje tilbod som i dag. Å ta vekk tilbod er ikkje rette måten å løyse det på, seier Gimmestad.
Allereie kort sesong
Lesarinnlegget var stila til den lokale klubben. Responsen tyder på at fotballforeldre utanfor Gloppen deler synet.
– Krinsen bør gjere noko med kampoppsettet. Sluttar fotballsesongen tidlegare kan ungane kanskje spele handball, seier ho.
Dagleg leiar i Sogn og Fjordane Fotballkrets vil ikkje korte ned det som allereie er av dei kortaste konkurransesesongane i europeisk fotball.
– Fotballforbundet har som mål å utvide konkurransesesongen så ein nærmar seg andre europeiske land, seier han.
– Må prioritere
Myklebust meiner bilete er meir komplisert enn som så. Han peikar på at uorganisert aktivitet stuper og at skjermar stel stadig meir av fritida til ungane.
Med to månader sommarferie, så er ikkje ein konkurransesesong frå april til november lang samanlikna med andre idrettar.
– For mange er treningane den einaste sosiale treffplassen og einaste aktivitet. Born og foreldre må saman komme fram til kva aktivitet ein har tid til og ikkje. Og idrettane lokalt kan samkøyre seg. Då kan også helgar takast i bruk, seier han.