– Den eine låg delvis under snøen, men blei redda opp av kameraten. Dette er erfarne fjellfolk, seier operasjonsleiar Eivind Hellesund i Vest politidistrikt.
Dei to utløyste snøskredet i fjellområdet ved Reppane under ein topptur.
Begge er uskadde, men tar seg no ned frå fjellet for å bli sett til av ambulansepersonell.
Politiet opplyser om at brotkanten på flakskredet er på kring 200 meter.
Det ligg ikkje noko turløyper i nærleiken, og skiløparane meiner dei har hatt god sikt over området både før og etter skredet.
– Det er ikkje mistanke om at andre er tekne av skredet, seier Hellesund.
Snøskredsesongen er i gang
Hovudredningssentralen ber folk vere klar over at snøskredsesongen er i gang.
Dei oppmodar folk om å vere varsame, gjere gode vurderingar, og ber alle i fjellet unngå farleg terreng.
– Sjølv om faregraden er ganske låg, synte det seg i dag at skreda har byrja å gå, skriv dei på Twitter.
Det er lite snø i fjellet og generelt stabile forhold, skriv varslingstenesta Varsom.no. Mest snø er det på Vestlandet.
Dei starta med å varsle skredfaren denne veka.
Skredproblema er knytt til fersk fokksnø. Typisk vil problema vere til stades i område der det er nok snø til at det er skiføre. Det kan vere fare for å løyse ut middels store skred.
Skredfaren for Voss ligg no på farenivå 2 – moderat.
