Skiskyttaren frå Stryn tente nesten 2,3 millionar kroner, og han står bokført med ein formue på om lag same summen. Det resulterte i 885.726 kroner i skatt til heimkommunen Stryn, fylkeskommunen og Staten.
I sesongen 2010/2011 tok Tarjei Bø tre gullmedaljar og to bronsemedaljar i VM, han vann verdscupen samanlagt, og han vann sprintcupen og jaktstartcupen. For alt dette vanka det ein god del premiepengar.
I tillegg vart skiskyttaren eit ettertrakta sponsorobjekt.
Som vi veit vart ikkje sesongen 2011/2012 like vellukkka sportsleg for Bø, og skattetala om eitt år vil truleg vise at han ikkje tente like mykje i 2012.
Fotballspelaren Azar Karadas hadde ei inntekt i 2011 på nesten 2,7 millionar kroner. Han står oppført med null i skatt, det heng saman med at han oppheldt seg i utlandet.
Ikkje spesielt feitt
Ser vi bort frå Karadas og Bø er det ikkje spesielt feitt for sportsprofilane frå Sogn og Fjordane.
Dei to fotballspelarane frå Vågsøy, Børre Steenslid og Peter Orry Larsen, tente begge rundt millionen. Sogndal-veteranen Eirik Bakke hadde ei skattbar inntekt på over ein million.
For vinteridrettsutøvarane, med unnatak for Tarjei Bø, er det bortimot sveltihel.