Sviktande tillit til bergenspolitikken

Bergensarane likar å seia ifrå – og no langar dei ut mot politikarane dei har plukka ut til å styra byen sin.

– Etter kvart har eg fått veldig lite tillit til dei, det må eg berre sei. Eg vurderer å la vera å røyste fordi eg er veldig skuffa, seier Ingjerd Hatland, som me møter tilfeldig på Torgallmenningen.

I ei meiningsmåling som InFact har laga for BA og NRK seier vel halvparten av dei spurde at tilliten til bergenspolitikarane har vorte svekka det siste halve året.

– Både avgang i byrådet, Drevland og skipsdåpen kan ha ein del betydning, det trur eg absolutt, seier byrådsleiar Martin Smith-Sivertsen frå Høgre.

Han trur svara i undersøkinga er farga av oppstyret rundt ordføraren sin gratistur til Venezia og rolla som gudmor for eit cruiseskip og at finansbyråd Liv Røssland frå Frp i førre veke gjekk av i protest.

– Har ikkje vor mykje rot

Men byrådsleiaren meiner bergenspolitikarane er betre enn ryktet skulle tilseia – trass at ni byrådar har gått ut av byregjeringa sidan valet.

– Eg vil ikkje sei at det har vore mykje rot. Det som er viktig for oss er å få fram politikken, og at Bergen faktisk vert styrt på ein god måte, seier Smith-Sivertsen.

Medan 52,4 prosent av dei spurde seier tilliten er svekka det siste halvåret, er det berre 6,7 prosent som har fått meir tillit til politikarane i byen. Resten veit ikkje eller har stabil tiltru til dei folkevalde.

Forstår bergensarane

– Det er trist, men forståeleg. Det har vore mykje rot og konfliktar i og rundt Høgre byrådet, spesielt det siste året. Eg trur at mange bergensarar no ristar på hovudet over alle politikarar, seier Arbeidarpartiet sin byrådsleiarkandidat, Harald Schjelderup.

Medan enkelte på gata i Bergen vel å vera nøkterne. Tyr andre til rein nostalgi.

– Eg saknar Herman Friele, ein verkeleg gallionsfigur, seier ein av bergensarane vi møter på gata.