I dag kom det eit piano til treningskjeda SATS i Bergen.
I samband med Edvard Grieg Septemberfestival skal det sveittast på utradisjonelt vis.
– Det er noko heilt anna enn det vi er van med, seier senterleiar Alse Pedersen, eg trur det vil gje ei emosjonell kjensle å sykle til klassisk.
Søndag kjem konsertpianist Liv Glaser til Bergen for å spele 21 av Grieg sine stykke til ein spinningtime.
– Det er mykje klassisk musikk som egnar seg til spinning, fortel ho, og den kan vere med å få musikken ut til folket.
71 åringen har tidlegare spelt til ein liknande time på Bekkestua i Bærum.
Der vart konseptet så godt motteke at dei har heldt fram med å trene til klassisk, men då med musikk på cd.
– Dei rytmiske stykka er best å sykle til, seier Glaser, Dovregubbens Hall går veldig fint.
Firhendig med direktøren
Til vanleg spelar Liv Glaser i meir "kultiverte" salar, men ho bryr seg ikkje om nokon meiner det er ufint å spele Grieg på SATS.
– Ein kan kanskje seie at dette ikkje er bra for den klassiske musikken, seier ho, men det er jo ein flott måte å nå ut til mange som kanskje elles ikkje går på klassiske konsertar.
På to av stykka ho skal spele i Bergen får ho selskap på pianokrakken. Direktøren for Grieg 07, Ragna Sofie Grung Moe, har teke utfordringa og skal spele firhendig med Glaser.
– Eg trur det blir morosamt, seier Glaser, vi kjenner kvarandre frå Musikkhøgskolen.
71 åringen håper timen også vil inspirere dei som er med til å kome seg ut å oppleve den naturen som inspirerte mykje av Grieg sin musikk.
– På spinning sit ein berre og sveittar mellom fire veggar, eg håper folk blir inspirerte til å høyre Grieg i øyrene sine, for deretter å gå ut i naturen og nyte det heile.