Dersom ein bulgarar vil, kan hen no skaffa seg ei t-skjorte med påskrifta «Ser deg i Førde». T-skjorta kjem frå ein handballcup arrangert av Førde IL.
Utvekslingsstudentane Kristian Krystad (26) og Julie Garmo (21) trudde ikkje det dei såg då dei fann rundt tusen norske plagg i butikken i Sofia.
– Det var heilt sjukt, seier Krystad.
– Veldig populære t-skjorter
Aller flest t-skjorter kom frå Tinestafetten og Tine fotballskule.
– Det er ein tankevekkar. Tenk så mange som er med på det. Må me ha Tinestafetten-t-skjorte kvart einaste år til tusenvis av barn? spør Krystad.
Sponsorsjef i Tine, Ann-Kristin Steenslie Syversen, peikar på at t-skjortene deira er i god kvalitet, og at born derfor kan ha glede av dei i mange år.
– Me veit at t-skjortene også går i arv til andre aktive små, seier sponsorsjef i Tine, Ann-Kristin Steenslie Syversen.
Syversen understrekar at dei ikkje sit att med store restlager, men at det som blir til overs blir gitt vekk til velgjersorganisasjonar.
Også fleire andre av t-skjorte-avsendarane NRK har vore i kontakt med, var overraska over at deira plagg dukka opp så langt heimanfrå.
Sender 97 prosent til utlandet
97 prosent av dei brukte tekstilane som blir samla inn i Noreg blir eksportert til utlandet for sortering, ombruk og gjenvinning. Det viser ein rapport frå Norsus frå 2020.
Fretex er ein av dei største private innsamlarane av tekstilar i Noreg.
Sjølv om det ikkje er sikkert at kleda i den bulgarske bruktbutikken kjem frå dei, kan dei gi eit bilete av korleis norske klede hamnar i utlandet.
Dei forklarer at når dei får førespurnad om å ta imot profiltøy, så er det fordi givar ønskjer at det skal bli handtert på ein berekraftig måte.
– Me sender normalt ikkje dei mengdene du skildrar her, utan å først sjekka med mottakar om kleda kan brukast i marknaden, seier eksportsjef Fredrik Bratterud.
«Bruk og kast» på sitt verste
Leiar i miljøorganisasjonen Framtiden i våre hender, Anja Bakken Riise, seier at mengda i butikken i Bulgaria viser at dette er klede som det verken var behov for i utgangspunktet, eller som vart selde for å brukast over tid.
– Klede som er laga for å brukast på eit idrettsarrangement, med årstal og lagnamn trykka på, har svært kort levetid og er vanskeleg å bruka igjen på den globale gjenbruksmarknaden. Dette er «bruk og kast» på sitt verste.
– Men er det ikkje positivt at norske klede kan bli selde vidare og brukte i utlandet?
– Det er positivt at gamle klede får nye eigarar, både i Noreg og i utlandet. Men når me ser på mengdene og kvaliteten, så er det ikkje berekraftig, seier Riise.