Helseminister Dagfinn Høybråten skal i løpet av dei komande vekene avgjere lagnaden til fødeavdelinga i Lærdal. Helse Vest har vedteke å gjere avdelinga om til ei fødestove. Dette har skapt sinne, frustrasjon og uvisse i Luster og resten av indre Sogn.
Åtvarande peikefinger
Ordførar Torodd Urnes rettar no ein åtvarande peikefinger til partileiarkandidat Høybråten i saka om fødeavdelinga. – Den måten han taklar saka om Føden i Lærdal kan vera med på å styrke eller svekke hans kandidatur, seier KrF-ordføraren.
Opnar for Lilletun
Dagfinn Høybråten er saman med Jon Lilletun favorittane til å ta over som partileiar etter Valgerd Svarstad Haugland, som går av i januar neste år. Lilletun blir oppfatta som ein samlande overgangsfigur, medan Høybråten er sett på som meir kontroversiell – men også meir framtidsretta. Torodd Urnes har tidlegare vore talsmann for Høybråten, men no er han usikker – han opnar no like gjerne for Lilletun.