Kommunal- og forvaltningskomiteen er ferdige med å handsame forslaget om å fjerne plikta til å etterforske gamle synder i strandsona.
I innstillinga som er sendt til Stortinget får Høgre-forslaget berre støtte frå Framstegspartiet.
– Vi er fornøgde med at det ikkje er politisk fleirtal for å lempe på ansvaret til kommunane når det gjeld lovbrot, seier Grete Wold (SV) i Kommunal- og forvaltningskomiteen.
I dag har kommunane plikt etter plan- og bygningslova til å følgje opp tiltak som er ulovlege – uansett kor gamalt forholdet er.
Norske kommunar brukar difor store ressursar på å gå etter tidlegare synder i den norske strandsona.
Ei oppgåve som kan vekse i omfang fordi gamal dokumentasjon ofte er mangelfull eller vanskeleg å oppdrive.
Dette var bakgrunnen for Høgre sitt forslag til Stortinget om å fjerne eller avgrense plikta til å etterforske ulovleg oppførte hus, naust og bryggjer i den norske strandsona.
– Ei urimeleg stor byrde for kommunane
«Plikta til å følgje opp alle lovbrot kan utgjere ei urimeleg stor byrde for kommunane. I tillegg kan det opplevast som ein vilkårleg og urimeleg praksis for innbyggjarar dersom lovbrotet er gjort veldig langt tilbake i tid eller av ein tidlegare eigar», heiter det i forslaget.
Forslaget vart lagt fram i april og har skapt stor debatt.
– Vi åtvarar mot det som i praksis kan føre til amnesti, skriv Noregs Jeger- og Fiskerforbund (NJFF) i eit høyringsinnspel.
Liknande appellar har kome frå DNT og Norsk Friluftsliv.
Bergens Tidende, på si side, har teke til orde for å «vurdere amnestispørsmålet på nytt» og «la dei eldste byggjesakene liggje».
Høgre er skuffa
Siri Gåsemyr Staalesen (Ap) sit i Kommunal- og forvaltningskomiteen og vil som resten av Arbeiderparti-kollegaene sine på Stortinget stemme nei til forslaget.
– Vi treng meir felles strandsone ikkje mindre. Eg kan ikkje fatte eller forstå kvifor Høgre vil at dei som byggjer ulovleg kan sleppe unna viss dei berre er smarte nok til å lure seg unna over fleire år, seier ho.
Stortinget skal stemme over saka 15. november.
Ove Trellevik (H) var blant dei som foreslo ei meir pragmatisk tilnærming til strandsonelova.
– Eg er skuffa. Her er det mange som har brukt krefter på å feilinformere. Via kronikkar og TV har dei hevda at dette vil bety økt «fri slepp i strandsona». Det er feil. Det vil gi fleire ressursar til undervisning og eldreomsorg, og mindre til advokatar og konsulentar, seier han.
– Dette handlar ikkje om å byggje ned strandsona
Framstegspartiet tok til orde for ei lovendring som presiserer at kommunane har «rett» og ikkje «plikt» til å følgje opp tiltak som er ulovlege.
– Dette handlar ikkje om å byggje ned strandsona, men om å rydde i gamle saker. Vi vil heller bruke ressursane i kommuneadministrasjonane på å sjå framover og laga gode planar for framtidig utbygging. seier Helge André Njåstad (Frp).
Signal om å mjuke opp strandsonevernet har også kome frå kommunalminister Sigbjørn Gjelsvik (Sp).
Raudt og SV foreslår i staden at regjeringa må komme tilbake med tiltak for å skjerpe oppfølginga.
– Det trengst meir, ikkje mindre oppfølging av ulovleg bygging i strandsona, seier Tobias Drevland Lund i Raudt.
Han legg til:
– Allemannsretten og vern av natur har altfor lenge lidd av at enkelte har teke seg til rette på kostnad av fellesskapet.