Oppryddingsarbeidet etter ekstremvêret «Nina» er i full gong søndag. BKK, kraftlag og kommunar jobbar på spreng for å få ting tilbake til det normale. Men det vil ta tid.
Søndag kveld er det 9 000 husstandar tilknytt BKK som er utan straum i Hordaland. Når stormen herja på sitt verste laurdag, var talet over 28.000.
Det er Hordaland som er hardast råka, men også i Rogaland har det vore meldt om mange straumutfall.
Vore utan straum i eit døgn
Tysnes kommune er nesten heilt utan både straum og telefoni søndag. Når NRK snakkar med Tysnes-ordførar Kjetil Hestad søndag, har han reist heilt nord på Tysnes for å få dekning på mobilen.
– Eg får signal frå Os eller ein anna stad rundt der. Så der er det ei antenne som bergar oss litt. Men mange er heilt utan både mobil- og fasttelefondekning, fortel Hestad klokka 14.30.
Han fortel at «Nina» trefte hardt.
– Det var brutalt. No har vi vore utan straum her på Tysnes i eit døgn. Vi veit ikkje når vi får straumen attende, men kraftlaga jobbar på spreng.
Straumen tilbake i Austevoll
Også på Austevoll har dei vore utan straum i nesten eit døgn, men klokka 15.30 kjem det gode nyheiter frå Sunnhordland kraftlag.
- Vi har fått skøyta linja til Austevoll og gjenoppretta forsyninga der. Så då skal Austevoll ha fått tilbake straumen sin, fortel Anne Gro Fiveland i kraftlaget.
Ho fortel at det også på Tysnes snart vil vera straum igjen.
- Vi håpar at det er gjenoppretta i løpet av kort tid, men torer ikkje lova noko. Vi har rydda linjene og skal prøvekopla.
I Lindås er det også mange utan straum. Vaktnummera til kommunen finn du her.
Full beredskap
Både på Austevoll og Tysnes er kommunane i full beredskap.
– At straumen er vekke skapar problem for fleire. Dei som treng legehjelp kan ta seg fram til Tysnes sjukeheim, der vi no har legevakt.
Dei som treng tilsyn frå lege i Austevoll, får moglegheit til det på Austevoll PO-senter.
– Vi har samla legetenestene der. Bebuarar på omsorgsbustader vert òg flytta over til PO-senteret, der det er varme, seier ordførar Renate Møgster Klepsvik.
- Kan ta tid før straumen er attende
BKK vil bruka helikopter i arbeidet for å få oversikt og for å få reparert skadane i Hordaland.
– Me vil prøve å få ei totaloversikt på skadeomfanget, og jobbar så raskt som mogeleg for å få inn att straumnettet. Det er ekstremt store skadar rundt omkring, og det er store tre som har ramla over linjene, og linjer har blåse ned, seier konserndirektør Tonny Nundal i BKK.
– Ein god del kundar må nok belage seg på at det framleis kan ta ei god stund før straumen er attende.
Klokka 14.00 er det 12.500 kundar utan straum i fylket. Nundal fortel at Nordhordland også har vore hardt råka.
– No skal straumen vera tilbake i Fedje, medan vi framleis jobbar i Austrheim.