– Om han vinn eksploderer det her

På kjøpesentet i Bekkjarvik, der Ørjan Johannessen vaks opp, står stemninga i taket onsdag ettermiddag. Johannessen kjempar med 23 andre kokkar om tittelen som verdsmeister.

Ved tretida onsdag hadde om lag 60 personar møtt opp på Bekkjarvik torg i Austevoll. Etter kvart som folk er ferdige på jobb dukkar stadig fleire opp.

Her kan du sjå direktesendinga frå Bocus d'Or.

– Høg puls

– Når han serverte fekk eg høg puls og det kitla i magen. Eg har vore veldig spent i heile dag, seier Camilla Tonning som jobbar på Bekkjarvik gjestgiveri, der Johannessen også har vore kokk.

Flagg, t-skjorter og plakatar er laga i stand for å feira at austevollingen deltek i VM.

– Det kjem til å eksplodera her om han skulle vinna. Det tok fullstendig då han vann EM, seier Tonning, som har jobba i lag med meisterkokken.

– Ser bra ut for Noreg

Også i VM-hallen i Lyon er det stor stemning blant dei norske. Fiskeriministeren, sju ordførar, personar frå norsk fiskerinæring og foreldra til 27-åringen er alle i hallen.

Tidlegare vinnar av Bocus d'Or Geir Skeie frå Fitjar er også blant dei som heiar på det norske håpet.

– Det ser veldig bra ut for Noreg, seier Skeie, like før det norske laget skal levera kjøttretten sin i Lyon.

Han fortel om litt av eit lurveleven hallen der konkurransen går føre seg.

– Det er mykje bråk i salen her, stor stemning og veldig kjekt, men du får ikkje så mykje med deg når du er med deg her som kokk, seier vinnaren frå 2009.

Skeie ser på Sverige, Frankrike og USA som dei største konkurrentane til Johannessen, som er ein av favorittane etter at han vann EM i fjor.

Superstjerne

Skeie kjem frå Fitjar som er nabokommunen til Austevoll. At nok ein vestlending hevdar seg er stort meiner meisterkokken.

– Det er jo veldig kjekt at naboøyene Fitjar og Austevoll kan hevda seg med så kort tids mellomrom, du vert jo ei slags superstjerne i kokkeverda om du vinn, seier Skeie på telefon frå den franske gourmethovudstaden.