Hopp til innhold

Stor flaumfare nordaust på Vestlandet

NVE har oppgradert flaumfarevarselet til raudt nivå for elvar og bekkar i fjellområde som omfattar nordaustlege delar av Vestland fylke, inkludert Stryn kommune. Varselet gjeld for perioden 27. juni 07:00 til 28. juni 07:00.

Måndag ettermiddag utvida dei det oransje farevarselet til også å gjelde Årdal og Luster kommunar i Sogn.

Varmt vêr i fjellet og mykje regn, som kjem på toppen av mykje snøsmelting, gjer at vassføringa i Strynevassdraget kjem til å auke. Vakthavande hydrolog i NVE, Erik Holmquist, seier at vasstanden i Strynevatnet, Lovatnet og Oldevatnet vil kunne stige betydeleg:

– Den kjem til å nå raudt nivå i løpet av kvelden eller morgondagen.

Flaumvarselet gjeld også delar av Sunnmøre, Romsdal og Sunndal.

I tillegg til flaumvarselet er det også meldt om fare for jordskred på oransje nivå for indre strøk av Sogn og Fjordane.

Oppdatert flaumvarsel kart måndag 16:55, henta frå varsom.no
Foto: Varsom.no