Varsom.no, NVEs si varslingsteneste for mellom anna snøskred, viser faregrad 3 i regionane Sogn og Fjordane, Voss og Røldal.
– Ein enkelt skikøyrar kan lette utløyse snøskred i bratt terreng. Det er ustabile forhold i desse områda, seier Karsten Muller hjå varsom.no
– Vurder din eigen kunnskap
Mykje snø i fjellet og skikkeleg ruskevêr i helga er grunnen til åtvaringa frå NVE.
– Det skuldast mykje snø kombinert med vind, og at det også finst stader med overflaterim der snødekket kan kollapse og føre til brot. Det er det som set i gang snøskred.
– Bør folk la vere å køyre utanfor løypene?
– Ein kan godt køyre puddersnø i terreng som er slakare enn 30 grader, og halde avstand frå veldig bratt terreng der det kan gå skred. Dersom ein ikkje er i stand til å vurdere skredfaren, bør ein halde seg i preparerte løyper, seier Muller.
Varselet gjeld heile helga
Folk bør setje seg inn i situasjonen før ein tek turen ut i fjellet i helga.
– Vi ventar eigentleg at situasjonen blir omtrent uendra dei neste to døgna. Det er framleis venta ein god del nysnø og vind, vi ser ikkje ei forbetring dei neste dagane.
– Folk bør følgje med på skredvarslinga og gjere gode vurderingar, seier Muller.