Stig fryktar å bli tvungen til køys

.– Når du fiskar så kan ikkje du berre drage opp reiskapen og gå og legge deg, seier Stig Oldeide.

Oldeide har vore fiskar i ein mannsalder. Men no opplev han noko nytt. For nyleg har fått nye reglar for arbeids og kviletid: Minst 10 timar kvile i løpet av 24 timar, og den eine kvileøkta skal vere minst 6 timar samanhengande.

Oldeide meiner regelverket ikkje heng saman med kvardagen på fiskebåt:

– På mindre båtar må alle vere i arbeid til ein går i land med fisken. Folk kan ikkje legge seg til å sove.

– Dette blir utfordrande

Det er Den Internasjonale arbeidsorganisasjonen (ILO) som har laga konvensjonen for arbeids- og kviletid for sjøfolk. Reglane, som også gjeld fiskarar, er ratifisert av Stortinget.

Regelverket vart gjeldande i november 2017, men leiar i Norges fiskarlag Kjell Ingebrigtsen tvilar på nytta:

– Vi vil sjølvsagt ha best mogleg sikkerheit, men dette kan tvert om auke arbeidspresset.

Ingebrigtsen seier ein fiskar aldri veit sikkert når arbeidsdagen er over:

– Ein må trekke det bruket som er der. Ein kan ikkje stå og kike på klokka og seie at no må ein legge seg.

– Men ulukker skjer lettast når ein er trøtt?

– Det tek fiskarane innover seg kvar dag. Eg føreset at fiskarane kjenner signala frå kroppen, seier Ingebrigtsen.

Føreset at fiskarane held seg til reglane

Årleg er det nær 80 personskadar i fiskerinæringa. I snitt mistar 7 fiskarar livet årleg.

Underdirektør Yngve Folven Bergesen i Sjøfartsdirektoratet meiner reglane er fornuftige:

– Fiskaryrket er eit av dei farlegaste yrka. Når folk jobbar lenge blir ein trøytte og mindre merksame. Ein skal kvile for å vere trygg.

Bergesen seier reglane har vore til stades før gjennom andre lover og føresegner:

– Men det er mykje som tyder på at fiskarane ikkje har halde seg til desse reglane, og vi har heller ikkje hatt fokus på kontrollar.

– Kva om ein har mykje fisk i garna, og så er kviletida der?

– Vi føreset at fiskarane planlegg fisket sitt, samstundes er der opning for å bryte reglane for å berge fangst.

– Kor lett blir det å kontrollere kviletida?

– Fiskarane skal dokumentere kviletida, men står fritt til å finne løysingar på korleis.

Vil kome fiskarane i møte

Sjøfartsdirektoratet og Fiskarlaget har nyleg hatt møter om korleis reglane kan tilpassast fiskeria. Stig Oldeide er spent på om det let seg gjere:

– Fiskarane sin arbeidsdag passar ikkje alltid inn i eit A4 regelverk.