Som puljevinnarar gjekk Huus og Sørum direkte til 2. runde i sluttspelet, som gjekk i Larnaka, Kypros.
Her vart det siger 22-20 og 21-18 mot det greske laget Kavaratiz og Kontostathis.
Men det polske laget som nordmennene møtte fredag kveld, vart for sterke. Bryl og Kujawiak vann til slutt 21-12. 21-13. Men ein 5. plass i VM er likevel ein sterk prestasjon av dei to unge spelarane.
Nøgde med både EM og VM
– Det vart rett og slett for tøft for dei, og det var eit greitt tap mot ein av favorittane. Det er alltid surt å tape, men vi er alt i alt svært nøgde med resultata i både EM og VM, seier juniorlandslagstrenar Magnus B. Johansen til Firda.
Huus går på Topp Volley Norge, og her trenar han sandvolleyball to gonger i veka. Sjølv om 17-åringen likar seg med sand under føtene, er det innandørs-spel han likar best.
– Det er framleis innandørs eg likar best. Kva som skjer vidare kjem litt an på kva utvikling eg får på beach og innandørs. Men vi statsar truleg fram mot U19-VM i sandvolleyball til neste år også, seier Huus til avisa.
Det har ikkje lukkast NRK å få kontakt med Bjarne Nikolai Huus.