Steffen frå Stryn driv verdas største Britney-fanside

Ho er ei av verdas største popstjerner.

Han driv verdas største Britney Spears-fanside.

På kvar sin måte kjempar dei no for å fri ho frå verjemålet sitt.

Han hugsar godt det fyrste albumet han fekk i 2004. Greatest Hits: My Prerogative. 

I 2008 sat han seg skikkeleg inn i livet til popstjerna. Han begynte å elske alt ved ho. Musikken, opptredande, personlegdommen. Alt. 

I 2010 starta han fansida Britney Spears Norge på Facebook. I 2012 skot sida til vêrs. 

Internasjonal merksemd

Rundt 2010 fanst det allereie norske Facebooksider for andre store popstjerner som til dømes Rihanna og Lady Gaga.

Fonn såg at det mangla ei Facebookside for sjølvaste Britney Spears, og tok saman med to veninner på seg ansvaret med å lage ei slik side.

Britney Spears Noreg blei den kalla.

– Plutseleg begynte folk frå heile verda å følgje sida. Vi måtte begynne å skrive på engelsk fordi vi fekk eit heilt anna publikum. Det heldt ikkje lenger å skrive på norsk, fortel Steffen.

No har sida ein halv million følgarar.

Han trur litt av grunnen til den enorme interessa for sida, er at dei delte bilete av god kvalitet, og at dei var tidleg ute med ferske nyhende.

– Så trur eg folk ser på oss som ei god kjelde på alt som skjer rundt Britney, spesielt no i det siste rundt #Free Britney-rørsla.

Møta

Britney veit at Steffen driv ein fanside om ho. Han møtte sitt store idol for første gong i 2015.

– Eg blei heilt mållaus då eg kom inn i rommet og såg henne. Superstjerna var fantastisk pen.

Ho hadde ein heilt spesiell glød og utstråling, seier ein begeistra Fonn. Trass ei litt sjenert Britney, hadde dei ein veldig hyggeleg samtale der ho lo av det Steffen sa.

Han fekk til og med ein klem av idolet sitt.

Andre gongen dei møttest skulle vise seg å bli heilt annleis.

Det var i Telenor Arena i august 2018, under verdsturneen Piece of Me.

Det var ikkje same spesielle gløden som møtte Steffen då.

Ho virka tristare. Som om tankene hennar var eit anna sted.

– Det er jo veldig trist å tenke på at ho følte seg tvungen til å vere der.

Seinare har Britney fortalt at ho blei tvungen til å gjennomføre turneen. Elles ville ho bli saksøkt av sitt eige management.

– Takk til fansen som støtter meg ...

#FreeBritney-bevegelsen har i stor grad fokusert på å spreie informasjon og auke bevisstheita rundt verjemålet til Britney. Far til superstjerna har vore verje for henne sidan 2008.

No i det siste har Britney ved fleire høve takka fansen for støtta i kampen for å få avslutta verjemålet.

Medieekspert Magnus Hoem Iversen er ikkje i tvil om at denne typen aktivisme frå fansen hennar har spelt ei viktig rolle.

– Den er viktig sidan den gir ei massiv støtte for synet hennar i denne saka. Fansen skapar auka merksemd, som igjen får dei større media til å skrive om saka, fortel Iversen.

Han er ikkje sikker på om ho hadde fått like mykje merksemd rundt situasjonen ho står i om det ikkje hadde vore for engasjerte fans.

– Utan dei hadde det vore veldig mykje vanskelegare for ho å nå fram med saka, seier Iversen.

– Det kjem til å ordne seg

– Britney har hatt enormt mykje å seie for fansen, ho har endra folk sine liv. #FreeBritney er fansen sin måte å takke ho på, fortel Steffen Fonn.

Om Britney blir fri eller ikkje, og kva som kjem til å skje, får framtida vise.

Aktivisten Fonn er ikkje i tvil om at ho kjem til å bli fri snart.

– Eg er 99 prosent sikkert på at ho kjem til å bli fri i løpet av hausten, seier ein optimistisk Fonn.