– Eg meiner vi bør vente på Stortingsbehandlinga, og få ei skikkeleg utgreiing på bordet før vi går i forhandlingar med andre fylke, seier senterpartipolitikaren Aleksander Øren Heen.
I fylkesutvalet sitt møte måndag var saka om å slå Sogn og Fjordane saman med Rogaland og Hordaland oppe til debatt. Eit samrøystes fylkesting, inkludert medlemmane i Senterpartiet har tidlegare sagt ja til å gå i forhandlingar, men no vil ikkje Heen meir.
– Eg er ganske uroa for å legge ned Sogn og Fjordane fylke. Det er mange verdiar å ta vare på. Det å styre si eiga framtid er ein verdi eg set veldig høgt, utdjupar Heen.
- Les også:
Venstre vil samarbeide om endringar
Regjeringa la nyleg fram regionmeldinga, der dei ser for seg å kvitte seg med dagens 19 fylkeskommunar og erstatte dei med ti regionar. Fylkesordførar Jenny Følling, også ho frå Senterpartiet, har vore positiv til å slå seg saman med resten av Vestlandsfylka. Men ho og andre har vore kritiske til at regjeringa ikkje har kome med nye og konkrete oppgåver for regionane.
– Om Senterpartiet vil ha store oppgåver til regionane, så er det fleire parti på Stortinget som vil samarbeide om å få det til. Eg kan garantere at Venstre vil samarbeide, seier fylkesleiar i Venstre, Gunnhild Berge Stang.
Medan Aleksander Øren Heen har lita tru på at det å bli del av ein større Vestlandsregion vil føre til noko positivt, er Stang langt meir positivt innstilt.
– Dette er ein sjanse til å henge om verdiskapinga på Vestlandet. Vi blir tappa for ressursar, og dette handlar om å sjå på dei grunnleggande strukturane i samfunnet vårt og ta makta tilbake til Vestlandsregionen, understrekar fylkesleiaren i Venstre.