Sprengt kapasitet etter dumping av pandemi-kjæledyr: – Det brest i hjartet

– Stort inntak den siste tida gjer at vi er nøydde til å setje på bremsen, og vi kan dessverre ikkje ta inn fleire dyr no, seier Beate Green, leiar i Dyrebeskyttelsen i Sogn og Fjordane.

Trenden er den same fleire stader i landet. Mange vil bli kvitt korona-kjæledyr, og det kjem i tillegg til alle dyra som treng hjelp av andre grunnar.

– Fleire av våre lokalavdelingar rapporterer om sprengt kapasitet, seier leiar i Dyrebeskyttelsen Norge, Åshild Roaldset.

I Sogn og Fjordane må dei seie nei til hundrevis av kattar som sårt treng hjelp, seier Green.

– Dette er noko av det tyngste eg har gjort. Det brest i hjartet.

– Fleire angrar på valet

I fjor merka dyrebutikkar auke i omsetnaden. Dyrebeskyttelsen var uroa for kva som ville skje med ein del dyr etter pandemien.

Veterinær og eigar av Karmsund dyrehospital, Bernt Lande, meiner han no merkar at fleire angrar på valet om å skaffe seg katt. Lande har vorte spurt om å avlive friske dyr, noko han ikkje vil gjere.

– Vi har opplevd ein auke i pandemien. I sommar har vi fått førespurnader fleire gonger i veka, fortalde dyrlegen til NRK tidlegare i haust.

Også dumping av kaninar er eit problem, fortel Roaldset i Dyrebeskyttelsen Norge.

– Vi veit at ein del dyrebutikkar var tomme for kaninar våren 2020. Vi ser no konturane av ein boom av dumpa kaninar, seier ho.

• Les også: Mange ønsker seg karantene-katt

Bølgje av korona-kattar

Green seier det er fleire ting som gjer situasjonen prekær.

– No kjem bølgja av kattane som folk skaffa seg under pandemien. I tillegg er det fleire kattekoloniar rundt omkring, seier ho.

Green seier det går det mot rekord i kor mange dyr dei har teke imot. Eit enkelttilfelle med ein kattekoloni med mange sjuke kattar har også teke mykje av kapasiteten i den lokale dyrevernforeininga.

Når det gjeld dumping av kattar, meiner organisasjonen det er to tiltak som må til for å sette ein stoggar praksisen.

– Vi har ein draum om at det blir påbode med ID-merking og kastrering, seier Green.

Også dyrlegar har tidlegare teke til orde for eit slikt påbod. Det same har Foreningen for omplassering av dyr (FOD) gjort.