– Eg er veldig nøgd med å få arbeide her. Eg har hjelpsame kollegaer som er tolmodig med meg når det kjem til norsken, seier Sbarta Iylio.
Etter to år i Noreg er det ifølgje SSB få flyktningar som kjem seg i fast arbeid. Derimot har Sbarta Iylio frå Syria kapra seg ein jobb i ei kosmetikkforretning etter ho arbeidde der i språkpraksis.
Ho kom til Noreg for litt over to år sidan. Etter at ho hadde gjennomgått introduksjonsprogrammet for flyktningar på Norsksenteret i Førde byrja ho i språkpraksis hjå Vita Exclusive.
Butikksjef Ann Helen Karlsen er godt nøgd med sin nye kollega.
– Ho er kjempeflink og verkeleg åndar for arbeidet. Då er det eit enkelt val å la ho arbeide her vidare, seier ho.
- Sjå rapporten frå SSB her (ekstern lenke).
Treng fleire språkpraksisplassar
Leiar på Norsksenteret, Aud Sletteland Solheim, seier det er eit stort behov for fleire bedrifter som kan tilby språkpraksisplassar til flyktningar.
– Det ideelle for integrering er at dei kan ha intensive norskkurs tre dagar i veka, og språkpraksis dei to andre dagane. Då får dei også moglegheit til å få ein fot innanfor det norske arbeidslivet.
Norsksenteret ser også at det er få flyktningar som kjem seg i fast arbeid etter to år i Noreg. Her kan språkpraksis vere med på å endre denne trenden.
Krav til språkpraksisplassar
Nestleiar Grethe Hammer Strømmen peikar også på utfordringar når det kjem til språkpraksisplassar. Formålet med ein språkpraksisplass er at flyktningen skal bli utfordra i å prate og forstå norsk. Her ser dei utfordringar med språkpraksisplassar som ikkje gjev dei den læringa dei treng.
– Flyktningane vil ikkje bli god i norsk om dei blir sett til å plassere varer i ei hylle. Dei er avhengige av ein språkpraksis der dei får bruke det norske språket aktivt kvar dag.
Vanskeleg å få seg jobb
Sbarta Iylio erfarer også at det er vanskeleg for flyktningar å kome seg i arbeid. Då må ein snakke godt norsk eller engelsk. Samstundes peikar ho på at ein sjølv må vere aktiv og vise at ein verkeleg vil.
– Det er viktig å vere aktiv, å møte opp på arbeidsstaden og spørje om dei har jobb til deg. Då er sjansane større for å få seg fast jobb.
Motivasjon ser ein også som ein viktig faktor på norsksenteret. Flyktningane må ha ein indre drivkraft for å ville bli integrert, seier nestleiar Grethe Hammer Strømmen.
Butikksjef Karlsen oppmodar andre til å ta i mot flyktningar på språkpraksis.
– Eg syntest det er verdt det. Dei lærer utruleg mykje av å bruke norsk i jobbsamanheng.
- Les også: