Det viser ei kartleggjing gjort av Bergens Tidende. Oversikta viser at vesle Solund har 12 nyetableringar per 1 000 innbyggjarar.
Det er betre enn tala for industrikommunane Årdal og Høyanger.
– Det er svært gledeleg, og positivt når ein ser kor mykje midlar som er spytta inn i områda der. Dersom vi klarer å skape så mykje utan dei same økonomiske stimulansane, så tykkjer eg det er positivt, seier leiar i Solund Næringsutvikling, Tom Erling Bahus.
Høyanger i botn
Tal nye bedriftsetableringar per innbyggjar i Solund, står i sterk kontrast til dei tradisjonelle industrikommunane Årdal og Høyanger. Sjølv om dei samla har fått over 100 millionar kroner i omstillingsmidlar sidan 2004.
Oversikta viser at Høyanger har seks nye etableringar i året per 1 000 innbyggjarar, noko som plasserer dei fjerdesist av kommunane i Hordaland og Sogn og Fjordane.
– Eg trur noko av grunnen er at vi har jobba med færre, men større prosjekt, seier Petter Sortland i Høyanger Næringsutvikling.
– Ikkje heile sanninga
Han meiner det er meir enn berre mange nyetableringar som er viktig for å skape arbeidsplassar. Jan Heggheim, fylkesdirektør for næringsavdelinga i Sogn og Fjordane fylkeskommune, er samd.
Han meiner tala ikkje fortel heile sanninga.
– Eg er ikkje utan vidare villig til å vere med på at det er talet nyetableringane som er styrande. Det er vel heller kvaliteten på dei. Slik eg kjenner etableringane i Høyanger, så er det gode etableringar som har god sjanse til å lukkast.