Natt til søndag brann store deler av Hotel Lune Huler i Lindås ned til grunnen. Det skjedde eit drygt døgn etter at Norsk Mottaksdrift fredag fekk kontrakt på å starte mottak for mindreårige asylsøkjarar i bygget.
- Les også:
Politiet slår fast at brannen var påsett og eldspåsettinga blir hylla på nettet.
No har Norsk Mottaksdrift skjerpa tryggleiken ved fire andre mottak der drifta enno ikkje komen i gang.
To av mottaka ligg i Hyllestad i Sogn og Fjordane, der dei nedlagde skulebygga i Leirvik og på Øn skal gjerast om til mottaksplassar for til saman 80 mindreårige asylsøkjarar. Allereie natta etter brannen i Lindås var ein eigen nattevakt på plass i Hyllestad.
– Det er svært tragisk og fyller ein med skam på vegner av medborgarane våre når asylmottak blir påtende på denne måten, seier sokneprest Bratten.
– Kva trur du er årsaka til at denne type hat kjem for dagen?
– Det er vanskeleg å seie. Men det er klart det kan ligge ei uro, ei redsle, ein angst for det ukjende.
– Kva er kyrkja og din bodskap i samband med at vi får mange nye flyktningar til landet vårt?
– Vi må ta imot dei med varme og kjærleik, og gje dei ein plass i samfunnet vårt. Oppmodinga til folk flest er at dei må vere medmenneske. Sjå på flyktningar som eit folk som kjem frå svært vanskelege forhold og som treng omsorg. Legg hatet bort, seier Bratten.
