Sognekraft vil ut av vindkraft

Årsaka er at dei ser langt betre lønsemd i vasskraft.

Styreleiar i Vestavind Kraft, Ola Lingaas, seier det blir utfordrande å finne pengar til prosjekta.

– Det å skaffe både eigenkapital og framandkapital til å finansiere vindkraftprosjekt er ikkje blitt lettare dei siste åra.

• LES OGSÅ: Får byggje vindmøller på Lutelandet
• LES OGSÅ: Klart Bremanger-ja til vindkraft
• LES OGSÅ: Droppar vindmøller til havs

(Artikkelen held fram under biletet).

Vasskraft og BKK-aksjar

Og no flaggar altså Sognekraft som eig 10 prosent av Vestavind kraft at dei ikkje ynskjer å satse vidare på vind, seier administrerande direktør Terje Bakke Nævdal i Sognekraft.

– Det er ei prioritering som Sognekraft har gjort. Vi har mykje vasskraft som vi ynskjer å byggje ut, samstundes som vi har ein intensjon om å kjøpe aksjar i BKK. Samla sett blir det eit kapitalbehov som gjer at vi må prioritere ulike forretningsområde.

Sunnfjord Energi held stand

BKK, som er største eigar i Vestavind, har også signalisert mindre interesse. Men Sogn og Fjordane Energi har ikkje planar om å gå ut av vind. Det har heller ikkje Sunnfjord Energi, opplyser styreleiar Harry Mowatt.

– Det er rett og slett fordi vi har eit aktuelt prosjekt på Lutelandet i Fjaler, så har vi Sulakraft der vi har interesser på vent. Der har Solund kommune avvist utbygging, men det kan tenkjast at saka kjem att ein gong.

Ikkje slik dei hadde tenkt

Men også han vedgår at vindkraft ikkje er blitt det dei hadde tenkt.

Lingaas seier årsaka til at dei framleis satsar på vind er at prosjekta deira er gode. Men han konstaterer at både dårleg kapasitet i straumnettet og tidkrevjande konsesjonsprosessar har dempa interessa.

– Samstundes har vi ei prisutvikling på kraft som ikkje har vist den same auken som vi hadde for nokre år sidan, så difor er folk meir nøkterne til sjansane til å få forsvart investeringane sine.