– Mitt inntrykk er at dette er eit forslag som er meint for å gjere alle fornøgde, og at det er eit ledd i valkampen, seier Luster-ordførar Ivar Kvalen.
– Så du er ikkje nøgd med avgjerda?
– Nei. Her burde dei følgt dei faglege vurderingane frå Statens vegvesen og gått «all in» for Hemsedal, men dette er nok mest meint får å gjera Hordaland fornøgd, seier Kvalen.
Saman med ordførarkollegane i Sogndal, Jarle Aarvoll, og Vik, Olav Turvoll, var han ikkje heilt nøgd med at ingen av vegalternativa fekk prioritet.
– Ingen har fått akkurat det dei håpa på, men vi skal gleda oss for at det vert gitt signal om utbetring av alle, seier Sogndal-ordførar Jarle Aarvoll.
Det var venta at Regjeringa og samarbeidspartia skulle legg fram om riksveg 52 Hemsedalsfjellet eller riksveg 7 Hardangervidda skulle bli hovudveg nummer to mellom aust-vest.
Dei valde å satse på begge to, pluss eit tredje alternativ.
I korte trekk vert Hardangervidda satsa på for persontrafikk, medan Hemsedalsfjellet skal vera for næringstrafikk.
- Riksveg 7 Hardangervidda skal utviklast som hovudvegsamband for persontrafikk, med stor vekt på dei mogelegheitene som finst for turisme, og med omsyn til villreinproblematikken.
- Riksveg 52 Hemsedal skal vere hovudvegsamband for næringstransport. Her skal det leggast vekt på å få trafikken bort frå sentrum og få opp fart og vinterregularitet.
- E16 er vintersikker, men er den som har lengst køyreavstand Oslo-Bergen. Vegen skal fullførast og vil vere ein viktig avlastningsveg når andre fjellovergangar er stengt, i tillegg til å betene dei områda som den betener i dag.
Tidlegare har det blitt bestemt at E134 Haukeli skal vera hovudvegen.
- BAKGRUNN:
- Les også:
Saka fortsett under bilde.
Gjekk i mot vegvesenet
I to omgangar har Statens vegvesen lagt fram at riksveg 52 over Hemsedalsfjellet har vore det beste alternativet.
– Eg trur ikkje eg har sett regjeringa gå i mot tilrådingane frå fagetatane på denne måte før. Dei har fått ei fagleg vurdering to gonger og begge har vist at riksveg 52 har vore det beste alternativet, men vel å gå delvis i mot det, seier Aarvoll.
Han skulle sett at det var prioritert hardare.
– I politikken må ein prioritere. Her seier dei ja til litt av alt og då er faren at ingenting vert gjort skikkeleg, seier Aarvoll.
Stortingsrepresentant for Venstre, Sveinung Rotevatn, meiner Sogn og Fjordane kan leve godt med avgjerda som vart lagt fram.
– I utgangspunktet skulle eg ønska at ein var tydelegare på at riksveg 52 skal prioriterast som hovudsamband. No får vi i staden ei funksjonsdeling, men den tenkjer eg vi bør kunne leve greitt med her i fylket, seier han.
Ingen kostnadsramme
I pressemeldinga frå samarbeidspartia står det ingenting om når oppstart av utbetringane vil skje. Det står heller ingenting om kor mykje det heile kjem til å koste.
– I den kommande NTP vil det bli lagt inn pengar til strekningsvise utbetringar på alle strekningane. Dette er tiltak som kan komme raskt i gang. Det vil bli kalla «samordningsstrekninger» – der Statens vegvesen får mogelegheit til å bruke mindre beløp for å utbetre kritiske flaskehalsar utan at det blir definert som store, enkeltståande prosjekt, seier stortingsrepresentant for Høgre, Bjørn Lødemel.
– Det er eit pluss at tungtransport vert prioritert over Hemsedal. Då må standarden vera deretter, men dei burde vald ein, seier ordførar i Vik, Olav Turvoll.