Her i fylket har 424 bilistar mista førarkortet sidan dei automatiske trafikkontrollane starta opp i 2003. 41 av desse så langt i år.
På same tid har 4066 bilførarar fått fartsbøter. Ifølgje tal frå UPs ATK-sentral kjem over halvparten av bøtene frå Gudvangatunnelen i Aurland.
– Vi har hatt større driftstid på ATK-boksane. Dette fører naturleg med seg fleire straffbare overskridingar og førarkortbeslag. Ser ein reaksjonane i forhold til tal kontrollerte bilar, så er det ikkje store skilnader, seier trafikkoordinator Trond Olav Hatlenes hos Sogn og Fjordane politidistrikt.
Meir aktive i år
Magna Fondenes Vangsnes hos plan- og forvaltingsseksjonen hos Statens vegvesen stadfestar at fotoboksane har vore meir «på» enn tidlegare i år.
I tillegg fekk også Lærdalstunnelen fylkets første snittmålar i juni i fjor.
- LES OGSÅ: Denne fekk farten kraftig ned
– Her var det drift halve året i fjor. I 2014 har det vore kontinuerleg drift, men også i dei andre fotoboksane har det vore meir driftstid. I fjor hadde vi ein del tekniske problem, samt vedlikehaldsarbeid enkelte stader som gjorde at driftstida var mindre enn i år, seier ho.
Kring 20 prosent av dei som blir tekne, er utanlandske køyretøy.
Ikkje styggare køyring
Medan fleire har fått førelegg i Sogn og Fjordane siste åra, har tala på landsbasis gått ned. Frå 135.485 på denne tid i fjor – til 121.094 i år. Per 1. november i år hadde Statens Innkrevingssentral kravd 192,9 millionar kroner frå fartssyndarar på norske vegar. Ein førebels nedgang på 20 millionar frå i fjor.
Som i Sogn og Fjordane passerer fleire køyretøy fotoboksane – og det passerer fleire køyretøy per fartsoverskriding og førarkortbeslag.
– Meir kontrollaktivitet fører til fleire reaksjonar, men vi ser at sjølv om driftstida er lenger på boksane, så er det ikkje prosentvis store skilnader. Eg trur nok vi kan slå fast at det ikkje er auke i stygg køyring, seier Hatlenes.
Ingen nye boksar
Dei automatiske trafikkontrollane blir gjennomførte som eit samarbeid mellom Politiet og Statens vegvesen.
Både Fondenes Vangsnes og Hatlenes i politiet seier ikkje ligg føre planer om å setje opp fleire fotoboksar på vegnettet i Sogn og Fjordane.
– Men på generelt grunnlag er det ikkje tvil om at ATK-boksar verkar førebyggande. Ikkje minst snittmålingane. Slik sett vil det vere førebyggande å ha fleire ATK-boksar plassert kring om i fylket, seier Hatlenes.