Medan det for tida er full innreisenekt for turistar til Noreg, er det betydeleg cruisetrafikk over store delar av verda.
– Folk har lyst å reise på cruise og det er allereie mange cruiseskip som går, seier driftsleiar Jon Olav Stedje i Aurland Hamnevesen, medan han ser utover ei tom cruisekai i turistbygda Flåm.
Normalt kjem det meir enn ein million turistar til Flåm kvart år, men no vel reiarlaga andre destinasjonar.
UVISS OPNING: Førebels veit ingen når det igjen kjem cruisebåtar til Flåm og andre norske hamner.
Foto: Linda Olin Reite / NRKSidan august i fjor har 350.000 passasjerar reist på cruise, viser tal frå CLIA (Cruise Line International Assosiation).
Trafikken går til ulike destinasjonar i Middelhavet, Gran Canaria og Asia. Men norske hamnesjefar kan førebels sjå langt etter turistane.
I 2020 kom det berre eitt cruiseskip til Flåm. Så langt i 2021 har alle planlagde anløp blitt kansellerte.
– Mai og juni er truleg «gone», seier driftsleiaren.
HÅPER PÅ OPNING: Driftsleiar Jon Olav Stedje meiner det er mogleg å ta imot cruiseturistar på ein trygg måte, også under pandemien.
Foto: Eirik Johnsen / NRKPlanar om opning
No jobbar bransjen med å legge til rette for å opne opp att trafikken.
Eit av forslaga er ein trafikklys-modell, som gjer at det skal vere mogleg å ta imot cruisegjestar også under ein pandemi. Kva tiltak som blir innførte, vil avhenge av kor høg smitten er.
- Grønt lys. Ingen restriksjonar. Mottak av passasjerar som før covid-19.
- Gult lys. Passasjerane går i land som samla gruppe. Minimal eller ingen kontakt med lokalbefolkninga. Kontakt med tilsette berre med strenge tiltak.
- Raudt lys. Ingen ilandstiging.
Ifølge Stedje er det fleire cruiseskip som i haust og vinter har brukt denne modellen, mellom anna i Middelhavet, for å hindre smitte. Tala frå CLIA viser at rundt 50 cruisepassasjerar har fått påvist korona, men at det ikkje har vore noko større enkeltutbrot.
– Eg er ganske sikker på at det kunne vore gjennomført på ein trygg måte her også, men det er ikkje opp til meg eller oss å bedømme.
I dag vert trafikken for kystcruise i Noreg strengt regulert.
Reglane seier at det maksimalt kan vere 200 om bord, som av næringa i realiteten blir oppfatta som ein innreisenekt.
– Noreg er framleis på ønskelista til cruisereiarlaga. Dei er klare når norske styremakter vurderer det som trygt for dei å kome, seier Stedje.
Håpet er ei gradvis opning frå juli og utover hausten.
Slusing til tog
Om styremaktene godkjenner ei gradvis opning, seier reiselivet i Flåm at dei er klare.
Planane er allereie lagde for korleis turistar kan slusast og isolerast på veg til Flåmsbana, sightseeing-båtar og diverse butikkar.
PASSASJERAR TIL TOG: Eigne korridorar til Flåmsbana kan bli eit av fleire tiltak for å hindre smitte frå cruisepassasjerar til lokalbefolkninga.
Foto: Kjell Arvid Stølen / NRKFør pandemien var arbeidsløysa i kommunen null. No er den på rundt 17 prosent.
– Ein sesong til med berre norske turistar vil vere særs krevjande. Då må vi stenge og ta ned delar av tilboda, seier Vidar Hauståker i reiselivsorganisasjonen Norway's best.
Helse- og omsorgsdepartementet stadfestar at retningslinjene for kystcruise skal reviderast innan 1. juni.
På grunn av smittesituasjonen er det for tidleg å konkludere om eller eventuelt når det blir opna for meir normal cruisetrafikk, skriv departementet til NRK.
