17. mai–vêret: Frå snø i nord til knallvêr i sør

– Det blir ganske store kontrastar i landet, fortel statsmeteorolog Charalampos Sarchosidis om vêret 17. mai.

Etter to koronaår er det endeleg duka for lange barnetog og folkehav på nasjonaldagen.

Då er det mange som ønsker seg sol og opphaldsvêr, men det ser ut til at berre halve landet får det. Eit høgtrykk plasserer seg nemleg midt i landet og deler Noreg i to.

Risikerer snø i toget

Det betyr at heile Sør-Noreg vil få fint vêr, medan det i Nord-Noreg blir meir variert.

I Troms er det venta snø nasjonaldagen.

– Du skal ikkje bli overraska om du vaknar til nysnø, seier Sarchosidis.

Det er likevel ikkje store snømengder det er snakk om. Utover ettermiddagen og kvelden vil nedbøren gå over til sludd eller regn.

– Det positive er at du ikkje kjem til å sveitte i bunaden, seier meteorologen.

Det typiske 17. mai-vêret

I fjor oppsummerte Meteorologisk institutt det «typiske» 17. mai-vêret i Oslo, Bergen, Trondheim og Tromsø.

– Faktisk ser det ut som temperaturane på 17. mai i år vil halde seg ganske nær gjennomsnittet for 1991–2020 i dei fire byene, fortel klimaforskar Jostein Mamen ved Meteorologisk institutt.«»

Kva som er det typiske 17. mai-vêret er likevel vanskeleg å svare på, fordi det varierer så mykje frå år til år, fortel han.

Kaldaste temperatur som nokon gong er målt ein nasjonaldag var på Finse i 1909 – med – 20,9 grader.

Varmerekorden sette Gvarv i 1980 med 27,5 grader.

Kan bli 20 grader i aust

Bunadsfolket i indre Agder og på Austlandet vil truleg få det varmt denne nasjonaldagen.

Der kan det bli temperaturar opp mot 20 grader.

Litt lågare temperaturar er langs kysten av Sørlandet og på Vestlandet, med rundt 16 grader.

– I Trøndelag blir det ganske fint. Det blir kanskje litt meir overskya enn resten av Sør-Nore med temperaturar på mellom 13–15 grader, fortel meteorologen.

Fint også i vest

Vestlendingane har god grunn til å smile over vêrmeldinga for 17. mai i år.

– Dei fleste modellane våre tyder på fint vêr, fortel meteorolog Julie Solsvik Vågane ved vêrvarslinga på Vestlandet.

– Det betyr gode periodar med sol og eigentleg ganske bra temperaturar på nasjonaldagen, legg ho til.

I Stad kommune i Vestland deltek alle barnehagar i eit eige tog i forkant av 17. mai. Kjølsdalen Montessoribarnehage var ein av barnehagane som troppa opp i regnvêret fredag.

– Det betyr ingenting. Vi er vande til å vere ute i all slags vêr, vi berre kler oss deretter, seier Oline Furnes, som er tilsett i barnehagen.

– Det blir litt finare vêr 17. mai, det blir kanskje kjekt òg?

– Ja, heldigvis, ler Furnes.

Kjølig i nord

Kaldast blir det i nord, med seks-sju grader.

Nordland er det einaste fylket der meldingane er usikre, fordi det er usikkert kvar høgtrykket vil plassere seg

– Førebels ser ut til at Nordland kan få opphaldsvêr. Det blir ikkje noko særleg med sol, men ikkje noko nedbør i alle fall, seier Sarchosidis

– Kanskje Vesterålen og Lofoten kan få nokre byer, men resten får det fint. legg han til.

I Aust-Finnmark og på Finnmarksvidda ser folk til å sleppe unna nedbøren.