Jørn er berginga for veglause

Uvêret gjorde skader for minimum 120 millionar kroner på vegnettet i Sogn og Fjordane. 1. juledag sette «Dagmar» Otterdal 60 år attende i tid då den vaska vekk nær to kilometer av vegen til grenda .

• LES OGSÅ: Distad (H) krev at Kleppa dekkjer vegraseringa
• SJÅ: Alle bileta av herjingane til «Dagmar»

Dei 11 innbyggjarane på nordsida av Hornindalsvatnet står langt ifrå like fritt som dei gjorde før jul.

– Særleg dei eldste ser avgrensingane. No må alt organiserast og planleggjast på ein heilt anna måte enn før. Og så er det uvissa, seier Reidunn Otterdal til avisa Fjordingen.

Hentar i båt

Utan vegsamband til omverda, har båtførar Jørn Nesdal blitt berginga for dei 13 innbyggjarane i bygda. Kvar morgon og ettermiddag hentar han otredøler til eller frå skule og jobb.

• LES OGSÅ: Vil ikkje tvangsevakuere Otterdal

Saman med Ronny Haugen henta Nesdal sin 21 fot store ribbåt han hadde liggjande i Rugsund etter at vegen vart sopt på vatnet.

Han får kompensasjon frå fylkeskommunen for transporten og er takksam for å ha ein fleksibel arbeidsgjevar.

– Eg likar å hjelpe til og likar meg på båt i all slags ver. Så enkelt er det, seier han til avisa.

(Artikkelen held fram under TV-saka)

Gjekk i vatnet

Trivsel i det våte element er eit must når ein skal ut i open båt på mørke morgonar og ettermiddagar. Og gjerne med slaps, regn og vind i lufta.

Familien Otterdal Heggen vedgår at det kan vere utfordrande å vere avhengige av båttransport for å kome seg ut av bygda. Enn så lenge har dei ikkje brygge i grenda.

– Det starta med at minstemann trakka ut i vatnet første dagen. Elles har det gått greitt, seier Otterdal til avisa.

Vil ikkje flytte

Båtrutene er tilpassa slik at born skal få halde fram med kulturskule.

– Vi set utruleg pris på servicen han har stilt opp med etter at vegen raste ut, seier Thore Heggen til avisa. Trass alle problema vil ikkje innbyggjarane flytte frå bygda.

• LES OGSÅ: Frp vil be folk flytte i staden for å rassikre vegen inn småbygdene
• LES OGSÅ: Følling har lite tru på Frp sitt flytte-forslag

No har fleire med tilknyting til Otterdal skipa initiativet «Trygg veg til Otterdal».

Ynskjer tunnel

Vegvesenet er så vidt kome i gang med å greie ut ny vegløysing til bygda. Truleg får ein tidlegast starte opp til sommaren.

I mellomtida vil bønder i Hornindal ikkje få tilgang til fôr som er lagra på gardsbruka i Otterdal. Grenda har fem gardsbruk med totalt kring 200 mål dyrka mark.

Inge Løvlid bur ikkje sjølv i grenda, men fortel han får store utfordringar med å halde fram med å drive gard der. Han meiner tunnel til grenda vil vere einaste vegløysing.