– Det er relativt stabile og oversiktlege forhold i heile landet no. Det vil seie moderat fare, som er normalen, seier Jostein Aasen, skredvarslar i NVE.
Påskeveka står for tur, og mange skal ut på ski. Tidlegare i vinter har eit gjort at det har vore betydeleg snøskredfare i store delar av landet.
Men no har det roa seg litt, fortel NVE. Sjølv om det framleis kan vera der fleire stader.
– Det som er viktigast å vera obs på er fersk snø og fersk vindflytta snø, seier Aasen, som presiserer at dei berre har eit sikkert varsel to dagar fram i tid.
– Det er snøoverflata folk i hovudsak treng å tenka på. Legg vinden att fokksnø i leheng? Er det mykje nysnø som kjem? Det er det viktigaste.
Skiftande vêr, skiftande føre
Dei som hadde håpa på ei einaste stor sol på vêrvarselet den neste veka, blir nok skuffa. Påskevêret blir skiftande i heile landet.
– Det er vanskeleg å peike ut ein vêrvinnar for påske, sa vakthavande meteorolog Eldbjørg Moxnes
Eit skiftande vêr betyr vanlegvis også skiftande snøskredfare. Men det blir ikkje veldig store variasjonar.
– No er snøen så stabil dei fleste stader at det skal mykje uvêr til for at skredfaren aukar betrakteleg, seier Aasen.
– UNNGÅ SKREDTERRENG: Det er oppmodinga frå NVE, dersom du vil vera heilt sikker på årets påsketurar.
Foto: Catchlight / NVESvakt snølag høgt til fjells
Det svake snølaget er likevel å finna fleire stader. Spesielt oppe i høgda kan ein treffa på det, og då kan raset potensielt bli stort.
– I Troms var det torsdag to svært store, naturleg utløyste skred på eit vedvarande svakt lag, seier Aasen.
– Generelt kan me seia at jo lenger vekk frå kysten og høgare opp ein kjem, jo lettare er det å finna dette svake laget.
Aasen seier Indre Sogn, Jotunheimen og Hallingdal er døme på slike område.
– Det skal ein del til for å påverka det. Men det er ein liten joker, dette snølaget, for om det først bli påverka, så kan skredet bli stort.
Han legg til:
– Sjekk skredvarselet på varsom.no før du skal ut på tur. Og unngå bratt skredterreng om det er mogleg.
