Hopp til innhold

Skuldar regjeringa for forfallet

Stortingsrepresentant Åge Starheim (Frp) meiner regjeringa gjer blaffen i tilstanden på norske fyr.

Stabben fyr og Åge Starheim

FORFELL: Langs heile kysten står fyr til forfall. Åge Starheim er skuffa over regjeringa.

Foto: NRK

- Dei reiser berre rundt og skryt av kor mykje pengar dei har løyva. Men det er tydeleg at det ikkje held mål, seier Starheim.

Treng 450 millionar

Langs heile kysten står gamle fyr til forfall. Totalt vil det koste 450 millionar kroner å ruste dei opp.

Like utanfor Florø står Stabben fyr og er i ferd med å gå i oppløysing. Her har det lenge runne vatn gjennom taket, og golvet er no heilt morkna.

- Dette skulle aldri ha fått skjedd. Vi skulle fått pengar til å reparere dette mykje tidlegare, seier Anita Johannesen i Flora Kystlag.

(Artikkelen held fram under videoen)

Video Fyrtårna forfell ved kysten

- Ikkje godt nok av regjeringa

Men Kystverket seier dei ikkje har pengar til å reparere alle fyra som står i forfall langs norskekysten.

Starheim meiner regjeringspartia har skulda.

- Dei kan ikkje seie at fyra skal få vedlikehald og bli verna, og så ikkje løyve nok pengar. Då går det gale og det veit alle, seier Starheim.

- Overraskar tilstanden på fyrbygningane deg?

- Nei, vi har fått inn ei rekkje signal på tilstanden rundt om kring. Dette er berre eit av mange felt der forfallet er stort.