Jaktar du på den kvite djupe snøen treng du ikkje reise langt. Ei oversikt på nettstaden Skiinfo.co.uk viser nemleg at tre skisenter i Sogn og Fjordane toppar snøstatistikken, langt føre andre kjende skiplassar i verda.
Verdsrekord i Jølster
Akkurat no har Jølster skisenter verdsrekord i snømengd.
Statistikken viser at skisenteret kan skilte med 1.70 meter snø nede i bakken, ligg høgre oppe har dagleg leiar Stig Tveit målt over 2 meter snø. Det synst han er heilt greit.
– Vi likar snø og prøver å skape ein næringsveg av snøen, så vi har ingenting og klage på akkurat no, seier Tveit.
Den siste veka har Jølster skienteret lege på snøtoppen i verda, med skisentera i Stryn og på Utvikfjellet som nummer to og tre.
- LES OGSÅ:
- LES OGSÅ:
Ved Stryn skisenter er det no 141 cm snø medan Breimsbygda skisenter på Utvikfjellet kan skilte med 130 cm.
To andre anlegg i Sogn og Fjordane ligg og på lista over dei 15 mest snørike skianlegga i verda. Både Hodlekve skisenter i Sogndal og Harpefossen på Eid vassar i snø.
Kan vere rasfarleg
Torsdag har det kome mykje nysnø i anlegget på Jølster og dermed aukar og rasfaren utanom anlegget.
Skisenteret vil dermed vurdere om dei skal opne heisane heilt til tops i bakken.
Dei som likar puddersnø treng heller ikkje leite utanom dei oppkøyrde traseane. Det er nemleg pudderalarm både i Jølster og dei andre skianlegga i fylket.
Og til helga er det meldt nydeleg veir.