Mange born og unge som er avhengige av å få behandling på sjukehus måtte flykta frå Ukraina då krigen brøyt ut.
No skal fleire av dei fortsette behandlinga i Noreg.
Sjukehusa rundt om i landet prøver no å føresjå kva behandlingstilbod pasientane vil trenge.
– Me førebur oss så godt me kan, men veit jo ikkje heilt kva me har i vente, seier viseadministrerande direktør Randi-Luise Møgster i Helse Bergen.
1.500.000 born på flukt
Ifølge Helse- og omsorgsdepartementet har regjeringa forplikta seg til å ta imot 550 ukrainske pasientar og deira pårørande.
I Bergen førebur helseføretaket seg no til å ta imot nokre av dei.
Tilsette les seg opp på bakgrunnsinformasjonen om flyktningane og orientere seg om folkehelsesituasjonen i Ukraina.
Ein av dei venta utfordringane er knytt til mangel på vaksinering, spesielt hjå born og unge.
– Me oppdaterer retningslinjene for sjukdommar me vanlegvis ikkje ser i Noreg, men som kan vera vanleg hjå ukrainske barn og ungdommar, seier direktør for barne- og ungdomsklinikken ved Haukeland, Ansgar Berg.
Han nemner særleg meslingar, tuberkulose og polio.
Svært mange av dei ukrainske flyktningane er under 18 år. Tal frå Unicef og Verdas helseorganisasjon tyder på at 1,5 millionar barn allereie har flykta ut av landet.
– Me har god kontroll
Berg understrekar at innbyggarar i Noreg ikkje skal vera redde for at det kan komma ei smittebølge via ukrainske flyktningar.
Alle får ein helsesjekk når dei først kjem til landet.
– Så dette har me god kontroll på. Uansett kor mange flyktningar me tar inn, blir det berre nokre få slike sjukdomstilfelle i helsevesenet vårt, seier Berg.
Kva behandlingsbehov ukrainske flyktningar faktisk vil trenga på norske sjukehus, veit ein førebels ikkje.
– Men me veit at det kjem mange kvinner og born, og at mange har vore vitne til eller utsette for traumatiske hendingar og opplevingar, seier Møgster i Helse Bergen.
Førebels få
Ifølge Møgster kan det bli aktuelt at tilsette i Helse Bergen blir flytta til avdelingar som får mange ukrainske flyktningar.
Enn så lenge har ikkje Helse Bergen hatt ein særskild pågang. Det same melder Oslo universitetssjukehus (OUS).
– Omfanget me har sett oss til no, gir oss ikkje store utfordringar. Me tilbyr ordinær pasientbehandling som me har kompetanse og kapasitet til på ein heilt grei måte.
Det seier Anders Beyer, pressevakt ved Oslo universitetssjukehus.
Dette sjukehuset har nasjonal koordineringsansvar for spesialisthelsetenester til flyktningar frå Ukraina.
– Vår rolle er å hjelpa helsestyremaktene med ei fornuftig og trygg gjennomføring, for å samordna og utnytta ressursane på ein god måte til beste for barn og vaksne som no kjem frå Ukraina, seier han.