Det har vore leita etter mannen sidan 29. juli, og lensmann Kristen Olav Grøttebø har no eit siste håp om å finne årdølen ved hjelp av miniubåt. - Det er ein sjanse for at den sakna framleis kan liggje på botnen av fjorden, og viss han gjer det er det ein sjanse for å finne han, seier lensmannen.
Arkivfoto: Arne Gunnar Olsen, NRK
Sjøforsvaret sitt skip "KNM Tyr" har det beste som finst av utstyr for å kunne gjennomføre søk etter sakna personar på havbotnen. Fartøyet kjem ifølgje Porten.no til Årdal på måndag kveld, og skal leite etter den sakna 46 åringen fram til onsdag.
Stort engasjement
Det har vore eit stort engasjement i bygda for å finne industriarbeidaren. Mange frivillige har delteke i søket, og det har og vore samla inn midlar for å leite med miniubåt.
No har Hydro, arbeidsgjevaren til den sakna, stilt opp med midlar for å få KNM Tyr til å leite i fjordbassenget. Resten stiller det offentlege opp med. Lensmann Kristen Olav Grøttebø ser på dette som ein siste sjanse til å finne industriarbeidaren. Alt anna har vore prøvd, meiner han.