Ser du kva det brune er?

Det er mjukt, litt søtt og smakar kanskje aller best til lefsene. Bli med til Gloppen der dei produserer det brune gullet.

lefse og gombe

SØT OST: Den kan minne om brunost eller prim, men er langt frå det same. Smaken er uansett søt og god.

Foto: Heidi Lise Bakke / NRK

– Vi kallar gombe for ein slags søt ost. Om mysa er med under koking, så blir det ein søt og god smak på gomben, seier Egil Fjellestad.

Med den karamelliserte smaken kan gombe minne litt om brunost og prim, men det er langt frå det same.

På Fjellestad Gardskjøkken brukar dei noko av mjølka frå 32 kyr på Lotsstøylen til å produsere ekte gombe. Mjølka tek Fjellestad med seg heim til Fjellbygda i Gloppen og til eit produksjonslokale inne i fjøsen.

– Det er veldig tilfredsstillande å mjølke på stølen. Mjølka tek vi med ned for å lage egne produkt som vi leverer ut til kundane. Det er triveleg og meiningsfylt.

Til både fest og kvardag

For Fjellestad er gombe noko som passar like greitt inn på ein måndag, som på ein laurdag. Det er likevel ei høgtid der dei sel mest gombe.

– November og desember står for 40 prosent av produksjonen, seier Fjellestad.

Jula er høgsesong, men sommaren ligg rett bak på ein god andreplass. Det har si naturlege forklaring, meiner Fjellestad.

– I sommarsesongen når det er turistar og feriefolk heime, så kjøper dei ofte med seg gombe for å ta med seg heim igjen.

Egil Fjellestad har kyrne på Lotsstøylen i sommar

MJØLK FRÅ LOTSSTØYLEN: Egil Fjellestad får mjølka til produksjonen frå 32 kyr på Lotsstøylen.

Foto: Harald Kolseth / NRK

Smakar seg fram til best mogleg smak

Det tar tre dagar med innkoking før gomba er ferdig. Kvar einaste dag på jobb smakar Eli Solheim seg fram for å få ein best mogleg smak på gomba. Ho har kokt gombe i 25 år. Det er ingen enkel jobb, seier Fjellestad.

– Det ser kanskje enkelt ut, men ein må ta omsyn til mjølka ein tek i bruk. Ein må ha eit handelag og eit blikk for kva ein jobbar med heile tida.

Gombe

LAGAR GOMBE PÅ MJØLK FRÅ EIGNE KYR: På Fjellestad Gardskjøkken produserer Eli Solheim (t.h.) og Inara Frolova ekte gombe.

Foto: Harald Kolseth / NRK

Fjellestad deler villig kva ein bruker i gomba.

– Vi bruker litt sukker og semulegryn til jevning. For å få den rette smaken må vi smake til med sukker og mjøl for å få den rette konsistensen.

Han sel den eigenproduserte gomba på forskjellige butikkar i fylket, men det er ikkje berre her i fylket du kan finne gomba frå Gloppen.

– Den blir sendt til både Oslo, Stavanger, Trondheim og Bergen, avsluttar Fjellestad.