Regjeringa velsigna i dag Nordic Mining sine planer om å investere to milliardar kroner i rutilutvinning i Engebøfjellet.
Gruvedrifta vil i første omgang resultere i mellom 170 og 350 nye arbeidsplassar i regionen.
- Les også: Flagga på halv stong etter gruvevedtaket
– Justert etter folketal, så vil gruva bety det same for Sunnfjord som Mongstad har betydd for Nordhordland, seier Viggo Leikanger i Naustdal Sp.
Store ringverknader
Mongstad treng ikkje store introduksjonen. Forsyningsbasen til Frank Mohn AS er med sine 250 årsverk ein av dei største private arbeidsplassane i Nordhordland.
- Les også: – Ein gledas dag for norsk bergindustri
Ein Sintef-rapport utarbeidd for Sunnfjord Næringsutvikling viser at 300 arbeidsplassar knytt til gruvedrifta vil gje 530–570 millionar kroner årleg i samfunnsmessig verdiskaping i regionen.
– Det vil gje så mange ringverknader for næringslivet at det vil bli ein viktig motor for vekst i Sunnfjord, seier Leikanger.
– Prosjekt for framtida
Ordførar Håkon Myrvang (Ap) er glad for at ventetida no er over og meiner regjeringa fatta eit rett og viktig vedtak. Kommunestyret i både Askvoll og Naustdal har gått inn for gruvedrifta. Det har teke åtte år og utgreiingar for 110 millionar kroner.
– Dette betyr at vi no byrjar arbeidet med å få til mange arbeidsplassar til det beste for både vår kommune og for heile regionen, seier han.
– Vi skal ha ei veldig god forvaltning av sjødeponiet, så framover ynskjer vi å ha med oss miljøvernorganisasjonar for eit forsvarleg og godt prosjekt for framtida, legg han til.
Uro gjorde prosjektet betre
Av respekt for innbyggjarar som i dag har ein tung dag, vil verken Myrvang eller Leikanger heise flagget til topps. Saka har splitta innbyggjarane i kommunen og det politiske miljøet.
- Les også: – Dette er rett og slett galskap
Spesielt har uroa vore stor for miljøkonsekvensane og sjødeponiet. Myrvang meiner uroa har vore med å gjere prosjektet betre.
– Vi har veldig respekt for dei som har hatt den meininga, men det har også ført til at vi har brukt lenger tid på å få fram prosjektet, og det har gjort prosjektet endå betre, seier Myrvang.