– Eg blei heilt kald og fraus nesten til is, seier Hans Jørgen Brun, far til Kristoffer Brun.
Duoen var ein av dei største norske medaljehåpa før OL. I årevis har dei trent saman, reist og budd saman på konkurransar, og haldt vekta nede.
Ikkje minst har dei prestert godt internasjonalt. Tokyo-OL skulle vera den siste medaljekampen, før rokarriera til Are Strandli var over. Så skjer det som ikkje skal skje.
Eit vindtak gjer at Strandli missar på to tak, og plutseleg har båten velta. Brun og Strandli hamnar i vatnet.
– Dei har rodd saman i 13–14 år og aldri vore i vatnet. Så skjer det i ein semifinale. Det er bittert og heilt absurd, seier Hans Jørgen Brun då NRK møter han seinare på dagen.
Stolte av handteringa
Etter velten rodde Brun dobbeltsculleren i mål, medan Strandli kom seg opp i ein redningsbåt. Vel i land fekk dei trøyst av OL-veteran Olaf Tufte.
– Eg sa eg var lei meg (til Tufte). Det er eg som mista åra, sa Strandli til pressa etter uhellet.
– Det er ikkje sånn det fungerer. Ein er et lag, og ein ror saman, svarte Brun, skriv NTB.
At dei stilte opp berre eit kvarter etter velten, meiner Brun si bonusmamma Hilde Onarheim er fantastisk.
– Dei viser at dei er så tøffe og dedikerte, og så gode vener. Dette er Kristoffer. Han meinte det frå det inste i sitt hjarte. Han er heil ved, og han bryr seg, seier ho.
Onarheim er sikker på at Brun er lei seg, og at det vil ta tid å bearbeida sorga. Hans Jørgen fortel at han har prøvd å trøysta sonen.
– Det som er typisk han er at han har prøvd å muntra meg opp og. Han har sagt «dette går bra, pappa», seier Hans Jørgen Brun.
– Skal sørgja for at han blir tungvektar
Brun og Strandli har hatt eit strengt regime som lettvektarar. Brun har trent åtte timar om dagen kvar dag, utanom onsdag og søndag. Då er det i staden fire timar.
– Og så har dei hatt eit forferdeleg regime når det gjeld mat. Når han kjem heim igjen, er det slutt på teljinga av kaloriar, seier Onarheim.
Tida som lettvektar er ifølgje Onarheim også definitivt slutt for Brun.
– Me skal sørgja for at han blir ein tungvektar. Når han kjem her skal han få så mykje god mat og drikke han ynskjer, seier ho.
Jobbar og studerer i tillegg
I tillegg til å ha trent nesten 50 timar i veka dei siste åra, har Brun også teke meisterbrev som tømrar, og driv eit lite firma. Han har også byrja å studera til å bli arkitekt.
– Ingenting kjem seglande gratis. Eg skjønar ikkje at han får tid til alt, seier faren.
Uansett er familien sikre på at dei vil at Brun skal fortsetja rokarriera.
– Han har så mykje potensial. Det er dette han elskar, seier Onarheim.