Tal frå Norsk Institutt for Landbruksøkonomisk Forsking (NILF) viser at bruttoløna i landbruket var på 284.000 per årsverk i fjor. Dette er inklusiv det skattemessige jordbruksfrådraget.
Til samanlikning var snittløna for andre lønsmottakarar 487.400.
- LES OGSÅ: Her er bonden som støttar tilbodet
– Per årsverk i jordbruket som næring, så viser budsjettnemnda for jordbruket sitt oppsett at dei låg kring 200.000 kroner lågare, seier rådgjevar Oddmund Hjukse.
– Vi blir fly forbanna
NILF er eit frittståande og uavhengig statleg forskingsinstitutt med tilknyting til Landbruks- og matdepartementet. Representantar frå avtalepartane og andre fagpersonar sit i budsjettnemnda som har utarbeidd grunnlagsmaterialet for jordbruksforhandlinane mellom stat og bønder.
Som kjent er det no brot i forhandlingane. Bøndene bad om 1.500 millioner kroner meir. Staten tilbydde ti prosent av dette.
- LES OGSÅ: – Bøndene framstår som grådige
– I korte trekk er det i alle fall overraskande trist og elendig. Vi blir fly forbanna, seier leiar i Småbrukarlaget i fylket, Magnar Juklestad.
Grunnlaget i forhandlingane
Budsjettnemnda leverte sine tal til departementet i midten av april. Desse viser at medan bruttoløna i landbruket er 42 prosent lågare enn snittet, så tener sauebøndene langt dårlegare enn dette.
- LES OGSÅ: Ungdomen vil framleis bli bønder
Bøndene blir provoserte over at landbruksminister Sylvi Listhaug (Frp) meiner lønnsnivået og årets tilbod er godt nok. No aksjonerer dei over heile landet.
- LES OGSÅ: – Tradisjon for slike aksjonar
– Misnøyen er så stor som den kan bli i fylket, seier Juklestad.
Lettare å bli større
Leiaren i småbrukarlaget meiner den blåblå regjeringa ser ut til å ha starta prosessen med å byggje ned småskalalandbruket i distrikt som til dømes Sogn og Fjordane.
- KRONIKK: – Listhaug slaktar jordbruket
Frp-statsråd Listhaug avviser at ho prøver å kjennkje småbøndene, men seier at ho ynskjer å gjere det lettare for dei som ynskjer å bli større.
– Bonden skal bestemme meir, og staten mindre. Ynskjer ein å bli større, så skal ein få høve til det, seier ho.
Har ei oppmoding
Juklestad meiner regjeringa har innført eit omvendt Robin Hood-begrep, med å ta frå dei små og gje til dei store. Han har ein bodskap til dei som no skal fatte vedtak, om partane ikkje returnerer til forhandlingsbordet.
– Dei som skal avgjere no er Stortinget, og dei partia som støttar landbruket får vise det med kroner og øre og sende det tilbake til Regjeringa. Det vart gjort på 90-talet, då Stortinget sendte det tilbake med ei påplussing på eit visst tal hundre millionar, seier han og avsluttar:
– Noko liknande burde skje no, og det trur eg på.