– Det kan virke som at dagkirurgi kan er eit vere eller ikkje-vere for sjukehuset, det er jo absolutt ikkje tilfelle, sa styremedlem Knut Cotta Schønberg i debatten.
Vedtaket i styret inneber at det kan bli oppretta eit dagkirurgisk tilbod ved Nordfjord sjukehus inntil 60 dagar i året.
I hovudsak vil det vere pasientar frå Nordfjord med grå stær som vil kunne få gjort operasjonar på sjukehuset.
– Etter ei samla vurdering og under føresetnad av økonomisk dekning vedtek styret å starte opp med dagkirurgi i avgrensa omfang, om lag 60 dagar i året, heiter det i vedtaket.
Overlet betalinga til Helse Vest
I innleiinga av styremøtet la administrerande direktør Jon Bolstad vekt på at tal syner at det ikkje er eit tilstrekkeleg pasientgrunnlag for å opprette eit heiltids dagkirurgisk tilbod i Nordfjord.
Dette var styret samd i, men utfrå alle reaksjonane som har kome inn, valde styret å går for ei løysing der særlege eldre pasientar vil få eit tilbod nærare heimen.
– Dersom eg skulle prioritert dette innanfor rammene til Helse Førde så hadde eg ikkje gått inn for det. Føresetnaden er at eigar dekkjer både investering- og driftskostnad, seier styreleiar i Helse Førde, Jorunn Ringstad, til NRK.no.
– Vi har dekka behovet
Ho meiner at helseføretaket ikkje har råd til å leggje ei krone i potten for å få realisert eit avgrensa dagkirurgisk tilbod, og at det i så fall er Helse Vest som må sørge for midlane som trengs.
– Når vi ser på pasientgrunnlaget så har vi i dag dekka behovet til folk i Sogn og Fjordane. Då er det klart at vi ikkje kan byggje opp nokon overkapasitet innanfor våre rammer. Vil eigar gjere det, så ok, seier Ringstad.
Styret i Helse Vest får no vedtaket frå Helse Førde på bordet, truleg alt i sitt neste møte. Dermed har Jorunn Ringstad og dei andre styremedlemene i Helse Førde spelt ballen vidare.
Glad for prinsippavklaring
Ordførarane i Nordfjord har truga med at dei vil forsøke å melde seg ut av Helse Førde om det ikkje blir eit tilbod om dagkirurgi ved Nordfjord sjukehus. Etter styremøtet fredag var Eid-ordførar Alfred Bjørlo likevel rimeleg nøgd.
– Eg er i alle fall glad for at det vi har fått ei prinsippavklaring på at kirurgi kan vere ein del av innhaldet i framtidas lokalsjukehus.
- LES OGSÅ:
- LES OGSÅ:
- LES OGSÅ: