– Sveinung Rotevatn og Abid Raja går inn i regjeringa.
Det sa politisk kommentator i NRK, Magnus Takvam, i Dagsnytt 18 i kveld.
Dei siste timane har det kome fleire hint om korleis ei ny regjering kan bli sjåande ut.
Rotevatn har sidan hausten 2018 vore statssekretær for klima- og miljøminister Ola Elvestuen. No blir truleg Elvestuen erstatta av Rotevatn.
I 2013–2017 sat Rotevatn på Sogn og Fjordane-benken på Stortinget, og før den tid var han leiar i Unge Venstre.
Stolt partikollega
– Dersom dette er riktig er det fantastiske nyhende for Nordfjordeid og Nordfjord.
Det seier partikollega og fungerande leiar i Vestland Venstre, Alfred Bjørlo, til at sambygdingen no skal sitje ved kongens bord.
– Vi får ta eit lite atterhald til vi ser dei går ut på slottsplassen, seier han.
Bjørlo meiner Rotevatn er ein av dei fremste politikarane i sin generasjon uavhengig av parti. No ser han fram til å samarbeide med statsråden.
– Er dette rett blir det eit aldri så lite flagg og jubling her frå mi side, seier nordfjordingen.
Formelt sett er det kongen i statsråd som utnemner nye statsrådar. Det er venta å skje i morgon føremiddag. Endringane skjer etter at Frp sa dei ville gå ut av regjeringa.
Det har ikkje lukkast NRK å kome i kontakt med Rotevatn.