- Det står svært dårleg til med villaksen i dette området, seier Atle Kambestad i miljøvernavdelinga til Fylkesmannen i Hordaland.
LES ÒG:
Store problem
Tidlegare i dag vart det kjent at 8800 oppdrettslaks rømte frå slakteriet Viking Fjord Sunde tysdag kveld. Rømminga skjer i eit område som allereie er prega av hyppige angrep av lakselus og der mykje oppdrettslaks har rømt tidlegare.
- I tillegg har villaksen overlevd dårleg i sjøen i dette området, seier Kambestad.
Han tykkjer det er trist at villaksen nok ein gong blir truga.
- Dersom det ikkje skjer noko drastisk snart, er laksestamma i dette området på veg ut. Sjøauren slit også, fortel Kambestad.
LES ÒG:
Avverga
Fylkesmannen samarbeider no med Fiskeridirektoratet og med selskapet Viking Fjord Sunde for å organisera gjenfiske.
- Førebels er ikkje fisken kjønnsmogen, og det er bra, seier Kambestad.
Ove Gjerde i selskapet Viking Fjord oppfordrar folk til å fiska laksen og levera den attende til selskapet. Han lovar fiskarar 200 kroner i honorar per fisk. I tillegg har Viking Fjord fått løyve til å fiska med garn.
- Me har fanga eit hundretals fisk, men det er for lite, slår Gjerde fast.
Fylkesmannen har gjeve særskilt løyve til å fiska med kilnot i Etnefjorden, for å verna Etneelva og fiskane der. Folk flest får ikkje lov til å fiska med flytegarn. Det generelle forbodet gjeld framleis.
- Det vart sett i gang tiltak raskt etter at fiskane rømte, så me vonar Viking Fjord får fiska opp igjen mykje, konkluderer Kambestad.
LES ÒG: