I eit skriftleg svar til Stortinget skriv næringsminister Jan Christian Vestre (Ap) at kraft frå land ikkje nødvendigvis er ei «formålstenleg løysing» og at det er regjeringa sitt «primære mål» at krafta kjem frå ein annan stad.
Han viser til at kraft frå land «inneber store investeringar» og det er «store variasjonar» i gevinsten ved å forsyne plattformene med kraft frå land.
Ideen om å elektrifisere sokkelen er hovudstrategien for å halvere utsleppa på sokkelen innan 2030.
Totalt er planen berekna å koste opp mot 15 TWh. Ifølgje Dagens Næringsliv vil elektrifiseringa krevje 5,1 TWh innan utgangen av 2023.
Rasmus Hansson i MDG kallar signala frå regjeringa for «oppsiktsvekkjande».
– Dette tyder på at regjeringa er på veg bort frå det einsidige kravet om å elektrifisere norsk sokkel, seier han.
– Dette er eit sterkt og etterlengta signal frå regjeringa. Vi kan ikkje sløse bort landstraum som trengst til hushald, industri og omstilling på å grønvaske olja, seier Frode Pleym i Greenpeace.
– Regjeringa må følgje opp dei nye signala
– Elektrifisering av sokkelen er ein dårleg ide med ditto dårleg dokumentert miljøeffekt. Det er bra om Vestre er samd i det, seier Sveinung Stensland frå Høgre.
Rogaland Høgre vedtok i fjor at dei «vil ha ny gjennomgang av elektrifiseringa av sokkelen».
– Dette er gledelege signal frå Vestre. Å sende norsk straum ut på sokkelen, er ekstremt dårleg miljøpolitikk, seier kommunalråd i Stavanger, John Peter Hernes (H).
Rasmus Hansson oppmodar regjeringa til å «komme heilt ut av skapet» og gjere det klart at oljebransjen sjølv må ta ansvar for å kutte utsleppa sine. Ikkje med kraft frå land, men ved hjelp av elektrifisering til havs (havvind) og karbonfangst.
Han legg til:
– Då har fastlands-Noreg plutseleg 10–15 TWh meir til disposisjon. Det reddar mykje natur og kan skape mykje grønt næringsliv.
Rapport: Elektrifisering av sokkelen har massiv klimaeffekt
Offshore Noreg, som er interesseorganisasjonen for selskap på norsk sokkel, presenterte i januar ein rapport om klimaeffekten av å elektrifisere olje- og gassektoren.
Konklusjonen var at elektrifiseringa ikkje berre slår godt ut på den norske rekneskapen, men også gir europeisk klimagevinst.
I hovudkonklusjonen heiter det at «sletting av kvotar og ytterlegare tilstramming av kvotetaket» gjer at norske kutt slår ut på europeisk nivå med ein effekt på 80 prosent.
På same tid har ideen om å elektrifisere sokkelen vorte meir omstridd.
Bakom stemningsskiftet syng kraftmangel og pressa overføringskapasitet, men også meir grunnleggjande tvil om kor nyttig elektrifiseringa er.
Symbolisert ved eit skriv frå 2021 der Olje- og energidepartementet (OED) erkjenner at «effekten på dei globale utsleppa ved auka bruk av kraft frå land er usikker».
Andre hevdar at elektrifiseringa berre gir «papirgevinst» sidan gassen som blir «spart» blir brend ein annan stad.
Resonnementet byggjer på at den norske sokkelen er omfatta av kvotesystemet i EU, og at norske kutt vert «nulla ut» av utslepp på kontinentet.
Olje- og energiminister Terje Aasland har på si side gjenteke at han «står fast på måla» i Hurdalsplattforma der det heiter at regjeringa skal sørgje for vidare elektrifisering av sokkelen, men «i størst mogleg grad med havvind».
NVE har sju søknader om elektrifisering på bordet
Per i dag er det åtte felt på norsk sokkel som får kraft frå det norske kraftnettet.
I tillegg har NVE sju søknader om elektrifisering av oljefelt og petroleumsanlegg på bordet.
Blant desse er det omstridde Wisting-feltet i Barentshavet.
I fjor vart det vedteke å trekke ein straumkabel til Wisting-feltet etter at Equinor forklarte at det ikkje var tilstrekkeleg gass i reservoaret til å forsyne feltet med eiga kraft.
Prosjektet har vore karakterisert som «ein miljøbombe» og har skapt splid mellom budsjettpartnarane Ap og SV.