Opplevingsturismen aukar, og det merkar dei godt på Jølster Rafting AS. For to år sidan kåra VG elva deira til den beste raftingelva i landet.
I fjor hadde dei rekordauke i talet på besøkande, og i år kjem dei til å toppe besøksrekorden med 15 prosent. Omlag 2000 raftinggjestar vil ha vore innom i løpet av sesongen frå april til oktober.
Erik Steinset
Foto: Torbjørn Fardal / NRK- Er for alle
Og med så mange besøkande synst dagleg leiar, Erik Steinset, det er vanskeleg å seie noko generelt om kva som kjenneteiknar ein typisk raftinggjest.
- Eg har ingen typisk raftinggjest. Vi har alt frå familiar til folk godt oppi pensjonistalder, seier han.
Høyr
Internasjonal trend
Og det er ikkje berre ved Jølster Rafting fleire og fleire søker adrenalinkick. I resten av landet og i verda er tendensane dei same.
- Folk ynskjer i aukande grad opplevingsferiar, fortel forskar May Kristin Vespestad. Ho tek doktorgraden innanfor naturbasert aktivitetsferie ved Høgskulen i Harstad.
- Folk ønskjer ikkje lenger berre å sjå naturen. Dei ønskjer å gjere noko aktivt for å oppleve han. Noko som gjev dei meir enn berre det å sjå, seier ho.
Vespestad visar til The international ecotourism society, som skriv at naturbasert turisme i verda veks med 10-14 prosent per år. Ho trur det er fleire årsaker til dette.
Koplar av
- Folk gjer uttrykk for at dei koplar av når dei gjer noko aktivt. Det kan vere ein måte å bruke seg sjølv på ein annan måte enn dei gjer til vanleg, seier ho.
- Ser ein på samfunnet elles, ser ein eit stadig meir fokus på det at ein skal oppnå noko. Du ser ikkje den same statusen i å seie at ein har vore på ein sol- og badeferie.