Politikarar meiner dataspel er sport, men Idrettsforbundet nøler

– Vi samarbeider. Dette er eit skikkeleg samarbeidsspel, seier Alexander Orrestad.

Tiendeklassingen speler eit lagbasert skytespel med andre idrettsutøvarar.

Arenaen er gamingseksjonen på Idrettsenteret i Sogndal. Her samlast ungdom under mottoet: «Tren for å bli betre til å spele».

Målet er å få ungdomane ut av gute- og jenteromma, og å stimulere dei til å bli betre gamerar. Ved hjelp av fysisk aktivitet og sosiale møteplassar.

– Eg kjem til å ta med vener hit, i staden for å sitte heime og sveitte der, seier Orrestad.

Dagleg Leiar på Idrettsenteret Kolbjørn Rydvangen, har sett ei endring blant foreldre når det gjeld synet på gaming.

– Når ni av ti ungdommar er interesserte i dette, då må vi ta det på alvor, seier han.

Vil ha gaming inn i idrettsmodellen

Det nye gamingsenteret i Sogndal går inn under ein eigen «gamingstrategi» som Vestland fylkeskommune lanserte sist veke.

Målet er å styrke e-sportmiljøet i regionen og leggje til rette for at barn og unge har eit organisert tilbod for dataspel.

– Dette er ei statusheving av det som har vore ein uglesett aktivitet, seier Frank Willy Djuvik, som representerer Frp på fylkestinget.

Djuvik er sjølv ein ihuga «gamer» og har jobba for strategien i fleire år.

Konkret vil fylkeskommunen leggje til rette for liknande tilbod som det i Sogndal, og tilsetje ein eigen «e-sportkoordinator».

I tillegg har dei lyst ut utviklingsstipend på 40.000 kroner til talentfulle e-sportutøvarar.

Visjonen er å innlemme dataspel i den norske idrettsmodellen.

– Dataspel handlar om å lære strategi, språk og å spele saman som eit lag – alt som den norske idrettsmodellen ønskjer å promotere, seier Stian Davies (Ap).

I likskap med Frp-kollegaen er han gamer på kveldstid. På dagtid er han leiar i hovudutval for kultur, idrett og integrering i Vestland.

LES OGSÅ: I familien Redalen deler oldemor, mormor, mamma og døtrer same interesse: dataspel.

Noregs Idrettsforbund har vore avventande

Men er dataspeling ein idrett? Den internasjonale olympiske komité (IOC) har gått langt i å svare «ja» i ei offisiell uttale:

E-sport i konkurranseform kan bli betrakta som ein idrettsleg aktivitet. Spelarane som er involverte førebur seg og trener med ein intensitet som kan vere samanliknbar med tradisjonelle idrettar.

I 2020 lanserte dåverande kulturminister Trine Skei Grande (V) ein dataspelstrategi med namnet «Spillerom».

– Eg utfordrar alle som tviler på at e-sport er ekte idrett, til å prøve å spele ein finale i over sju timar, sa lagkaptein Casper «CadiaN» Møller til NTB i april.

Da hadde laget hans akkurat sikra seg sigeren i Counter-Strike-turneringa ESL Pro League.

Noregs Idrettsforbund (NIF) har likevel vore avventande med å ta Noregs E-sportforbund (NESF) inn i varmen.

I samband med søknaden E-sportforbundet ga til Idrettsforbundet i april var innstillinga at det var behov for meir informasjon.

Likevel har Idrettsstyret opna opp for at eksisterande forbund kan innføre dataspeling som ein idrettsgrein under seg, skriv Pressfire.

I fjor vart «gaminga sitt svar på UEFA» stifta då 28 delegatar frå ulike europeiske land møttest i EUs hovudkvarter.

E-sportforbundet er optimistiske og trur det berre er eit spørsmål om tid før dei får vere med i den store idrettsfamilien.

– Vi i det nasjonale forbundet er i tett dialog med Noregs Idrettsforbund og jobbar positivt målretta med dette, skriv generalsekretær Kjell-Erik Nordahl i Noregs E-sportforbund til NRK.

SJÅ TV-SERIE: Gamerne i NRK-TV.