– Eg kjente tuppen av kniven fysisk mot magen, seier Robin Kjærnsmo.
Han blei forsøkt knivstukken i magen av kvinna under Nye Nygårdsbro på Danmarks plass.
– Ho var sløv i blikket og snakka til meg. Men eg høyrde ikkje ka ho sa, fordi eg hadde hørepropper. Eg så kniven og kjente på redsel og tenkte at eg måtte komme meg bort.
Kjærnsmo kom seg frå staden utan fysiske skader. Han har vore på politistasjonen for forklare seg, skriv BA, som først omtalte forsøket på knivstikkinga.
Ikkje fysisk skadd
Like etter klokka 14 fekk politiet melding om ein person med kniv i området ved Danmarks plass som oppførte seg truande. Personen var sett gåande mot Bergen legevakt.
Politiet sende alle tilgjengelege ressursar til staden, og dei andre naudetatane rykka også ut.
Bergen legevakt sa først til NRK at to personar var skadd: Den mistenkte kvinna og ein tilsett ved legevakta.
Men har seinare sagt at det ikkje er snakk om fysiske skader på den tilsette.
Dramatisk oppleving
Den tilsette ved legevakta var tilfeldigvis utanfor legevakta då ho blei angripen.
– Den tilsette har ikkje fysiske skader. Ho blir tatt hand om av oss, og det går bra med henne, men ho har hatt ein dramatisk oppleving, seier legevaktsjef Dagrun Waag Linchausen.
Den andre skadde etter hendinga er den mistenkte kvinna. Ho skal ha kuttskadar i ein hand. Ifølgje politiet var ho tilsølt med blod.
– Ho er sendt til ved Haukeland universitetssjukehus, seier legevaktsjef Dagrun Waag Linchausen.
Søker etter fleire skadde
Politiet har ikkje funne andre skadde, men søker framleis i området for å vere sikre.
Innsatsleiar Tom Johannssen seier til NRK at det var fleire vitne til hendinga. Politiet snakka med desse etter hendinga.
Brannvesenet hjelpte også politiet med søket.
– Vi assisterer politiet med søk. Vi har nå ein mannskapsbil og ein brigadeleiar på staden, seier Ole Jacob Hartviksen i 110-sentralen.
Ni ambulansar rykka ut til staden. Fleire av desse har no køyrt igjen.
Det var mykje folk i området. To politibetjentar står vakt utanfor Bergen legevakt.
Politiet ber publikum ta kontakt på telefon 02800 om ein har opplysningar.
Dei ser alvorleg på hendinga.