Politiet har fått hjelp frå ein etterforskingsleiar i Kripos til avhøyr og liknande etter brannen på Selje hotel før helga. Tysdag vil etterforskinga på brannstaden ta til for fullt.
I alt 14 etterforskarar er på saka. Av desse fire frå Kripos.
– Når vi set inn så mykje kompetanse, så har vi godt håp om å finne brannårsaka. Vi tykkjer det er viktig å få klårleik i kva som har skjedd, seier regionlensmann Tormod Hvattum.
Varsla av naboar
Det var naboar som varsla om brannen natt til fredag. Romfløya var overtent då brannmannskap kom til staden.
Allereie før brannruinane var blitt kalde, meinte politiet å kunne seie kvar brannen starta.
– Vi tolkar brannbiletet slik at den starta på eit hotellrom i underetasjen av romfløya. Det gir oss eit utgangspunkt om kvar vi kan begynne dei tekniske undersøkingane, seier Hvattum.
Ser ikkje bort frå noko
Hvattum vil ikkje kommentere kva teoriar politiet jobbar ut ifrå.
- Les også: Ola høyrde fleire smell frå hotellet
– Vi kan ikkje sjå bort frå noko. Vi etterforskar breitt, med alle moglegheiter opne, seier Hvattum.
Sidan brannen har politiet avhøyrt fleire vitne, noko som vil halde fram dei næraste dagane. I dag vart også ein av dei tre eigarane avhøyrd. Dei var sjølve i Stockholm då det tok til å brenne, men kom til Selje laurdag.
Ber om tips
Politi og brannvesen har gjennom helga halde vakt ved branntomta. Hvattum seier at det er rutine ved store brannar.
- Les også: Hanne Krogh felte tårer for Selje hotel
– Vi ynskjer å halde brannstaden intakt og vil ikkje ha uvedkommande inn som øydelegg etterforskinga, seier regionlensmannen og legg til at dei frå dagslys tysdag vil etterforske for fullt på branntomta.
Politiet er framleis interesserte i tips frå publikum som har høyrt eller sett noko.
– Det kan vere informasjon som publikum meiner ikkje har betydning, men som kan vise seg å ha verdifull betydning i arbeidet med å finne ut kva som har skjedd, seier Hvattum.