Pakka ned Tall Ships - to år etter

Skilta i Gate 1 i Måløy og ved Degnepoll vart omsider skrudde ned måndag.

• LES OGSÅ: Rådmann krev velkomen-skilt fjerna

Skutefest med bakrus

Tall Ships Races vart ein fest med ein svært kostbar bakrus for Vågsøy kommune. Då armadaen av seglskuter forlet Ulvesundet i august 2008, sat kommunen att med eit underskot på mange millionar.

Likevel, som ei konstant påminning om arrangementet som utarma kommuneøkonomien, har informasjonsskilta som ønskjer velkommen til festen blitt ståande langs hovudvegane.

– Ei konstant påminning

Sist fredag gjekk Raudt-politikar Geir Oldeide ut i Fjordenestidende og kravde skilta fjerna.

- Vi var veldig samde om å legge det bak oss, og ein måte er i alle fall ikkje å konstant minne oss på det, utdjupa han overfor NRK.

Oldeide fekk også støtte frå fungerande rådmann Olav Horn som til liks med Raudt-politkaren kravde skilta fjerna. Dermed vart det fart i sakene, og måndag var skilta historie.

Seglet ryk tysdag

Det einaste som står att no, er Tall Ships Races-seglet ved Måløysundet.

Hos uteseksjonen i Vågsøy kommune får NRK opplyst at dette vil bli fjerna ved hjelp av kranbil i løpet av tysdagen.