– Eg har pengar i to fond i DNB, men eg har aldri tenkt på kven som forvaltar fonda, seier Celine Damler, som er sjukepleiarstudent ved Høgskulen på Vestlandet.
I september lanserte DNB kampanjen #huninvesterer med mål om å få fleire kvinner inn i aksjemarknaden.
Men kven har ansvaret for pengane etter dei er investerte i eit fond?
Tala viser at 28 av hovudforvaltarane til DNB er menn – mot tre kvinner.
Dei tre kvinnene er hovudforvaltarar for fond som til saman er på om lag 14 milliardar kroner.
Det er i underkant av fire prosent av dei om lag 357 milliardane DNB sine fond utgjer.
Dilemma med mannsdominans
– Parallelt burde ein ha ein eigen #hunforvaltar-kampanje, seier Nanna Ringstad i Finansforbundet.
Ho heiar på #huninvesterer, og meiner kampanjen er viktig og god.
– Men det er eit dilemma at mesteparten av pengane blir forvalta av menn, seier ho.
Ifølgje Ringstad er det typisk for bransjen at menn held posisjonane på toppen.
– Finans er ein kjønnsbalansert bransje, med omtrent like mange kvinner som menn, men når ein ser på direktørar og banksjefar byrjar biletet å bli ganske så skeivt.
Ei undersøking gjort av Morningstar frå 2016 viser at kvinnelege fondsforvaltarar er ein sjeldan sort.
I Noreg er omtrent 1 av 10 fondsforvaltarar kvinner. Til samanlikning har Spania, Frankrike og Portugal over ein femtedel kvinnelege forvaltarar.
Meir ujamt på papiret
– Det her er eit «work in progress», og vi er overhovudet ikkje i mål, seier Anette Hjertø.
Ho er leiar for Kvinner i Front-finans og porteføljeforvaltar i DNB.
Hjertø presiserer at forvaltninga av fond er gjort som lag, og at åtte kvinner i banken er med å forvalte fond, som del av eitt eller fleire lag.
– Kven som er hovudforvaltar er ein teknikalitet, fordi alle på teamet har ansvar for avkastninga til fondet, seier ho.
Ingen av DNB sine fond er forvalta av berre kvinner. Dei tre kvinnelege hovudforvaltarane deler begge rolla si med minst éin mann.
På si eiga nettside tek #huninvesterer for seg ulike utfordringar knytt til kjønn og likestilling. Men kjønnsbalansen blant fondsforvaltarar er ikkje eit tema.
– Det kan godt hende vi ikkje har diskutert denne problemstillinga i stor nok grad i satsinga, seier Anette Hjertø.
Trur menn er meir interesserte
Celine Damler og tre av studievenene på Høgskulen seier at dei opplever fond og investering som framand. Damler trur finans engasjerer fleire menn enn kvinner, og at det er ein viktig grunn til den skeive fordelinga.
– Det er dumt at forvaltning er eit så mannsdominert yrke, men eg tenkjer ein vel yrke ut ifrå interesse, seier Damler.