Denne sommaren hadde fleire håpa å få på plass ei prøveordning for turistskatt i Noreg.
Både i Geiranger og i Flåm håper dei at det kan vere politisk vilje til å satse på dette.
– For å banne litt i kyrkja, ta no for guds skuld turistskatt, seier Tone Rønning Vike.
Ho eig hotellet 29|2 Aurland i Flåm og ønsker at turistane skal betale slik at dei kan legge til rette for masseturismen som ein forventa kjem tilbake etter pandemien.
Stortinget legg det på vent
Ei prøveordning med turistskatt har lenge vore ønska i verdsarvlista Geirangerfjorden og Nærøyfjorden (Sogn).
Visit Sognefjord har vore prosjektleiar for ei slik ordning rundt Flåm og Aurland.
– Det står på politisk vilje, men vi håpar å få gjennomført og prøvd ut dette allereie frå 2020. Så får vi sjå kor lang tid det tar, seier Ståle Brandshaug, leiar i Visit Sognefjord.
Men på Stortinget skjer det ingenting så lenge pandemien herjar.
– Heile spørsmålet blei på eit vis droppa i lys av korona, seier Tom Christer Nilsen (H) som sit i Stortingets næringskomité.
Sjølv er fleire parti positive til ei slik ordning i framtida.
– Alle utanom Høgre og Frp signaliserte vel at dei ville vere open for ein eller anna form for betaling av fellesgode, seier Nilsen.
Positive til turistskatt
– Vi sit på ein natur som er heilt eineståande i verda, derfor er vi ein verdsarv. Då må vi kunne ta oss betalt, seier Rønning Vike i Flåm.
Det kan verke som utanlandsturistar er villige til å gjere.
I 2019, før korona, undersøkte Transportøkonomisk institutt kor positive turistar frå andre land er villig til betale ein slant for å oppleve norske fjordar og fjell.
Over 2500 utanlandske turistar i Noreg deltok i undersøkinga.
– Det vi kan konstatere er at svært få er negative til turistskatt, seier TØI-forskar, Petter Dybedal, til Dagsavisen.
Turistskatt er heilt vanleg i fleire land i Europa. 19 av 28 EU-land har allereie innfør ein form for turistskatt, ifølge ETOA.
I Tromsø har dei problem med utfartstoalett, parkering og søppelhandtering på populære turistmål.
Dei opplevde stor vekst i reiselivet fram til pandemien.
– Vi har ikkje infrastruktur til at heile verda kan kome å sjå nordlyset, seier Tone Marie Myklevoll, leiar for kommune- og byutviklingsvalet i Tromsø Kommune.
Ho er positiv til turistskatt og meiner øyremerka midlar til toalett og parkering er vegen å gå.
– Vi blir prega av besøkstal og då handlar det om å finne tiltak som kan vareta naturen og sikre ein berekraftig vekst.
Ei undersøking frå Innovasjon Norge i 2019 viste at fleire i lokalbefolkninga i Stavanger, Ålesund, Stranda (Geiranger), Lofoten, Aurland, Stryn og Longyearbyen, var misnøgd med det som følgjer med masseturismen.
Misnøya er stor blant to tredjedelar av befolkninga.
- 69 prosent seier turistar medfører forsøpling
- 62 prosent seier dei slit ned naturen
- 65 prosent vil innføre turistskatt
NHO: – Heilt unødvendig
NHO Reiseliv har lenge vore imot ei ordning med turistskatt.
– Pressområdet for turisme har vi 7–8 stader i landet i nokre få veker. Då er det betre med gode reguleringar og tilrettelegging for ferdsel, seier næringspolitisk fagsjef, Ole Michael Bjørndal.
– Det er ei unødvendig løysning.
Han meiner det er eit dårleg tidspunkt å ta opp att debatten om turistskatt.
– Akkurat no er det slik at reiselivet knapt står oppreist på grunn av ein global pandemi. Så det å pålegge nye skattar på reiselivet no, står fram litt absurd, seier Bjørndal.
Det er Myklevoll i Tromsø ueinig i.
– Eg meiner vi bør bruke tida på det no. Vi har eit kvileskjær der vi kan sjå på korleis vi kan bli enda betre på å sikre ein berekraftig besøksturisme i landet vårt, seier ho.