Aksjonen var eit samarbeid mellom Statens naturoppsyn, Fiskeridirektoratet, politiet og Kystvakta. Leiar for aksjonen, politibetjent Roar Bøe, i Gloppen, seier funna var nedslåande.
– Bakgrunnen for aksjonen er at vi har fått mange tips om at det går føre seg hummarfiske i Nordfjord utanom sesongen, seier Bøe.
Det vart gjort beslag i alle kommunane aksjonsgruppa var innom: Stryn, Eid, Gloppen, Bremanger og Vågsøy.
Alle dei ulovlege reiskapane var berekna på hummarfiske, sjølv om hummaren er freda fram til 1. oktober.
– Vi gjorde veldig mykje beslag, over 100 teiner som stod i sjøen det døgeret vi kontrollerte. Og alt var sett for å fiske hummar, som er ein utryddingstruga art, seier Bøe.
Teiner berekna for krabbefiske skal ha to fluktopningar på minst 80 mm, dei som vart funne i aksjonen hadde stort sett fluktopning på 60 mm, eller ingen fluktopningar.
Ruser er ikkje lovleg i det heile. All reiskap skal vere skikkeleg merka. Det meste av det som vart funne under aksjonen var umerka. Berre eit fåtal av teinene som vart kontrollerte var lovlege.
- Les også:
– Somme av dei ulovlege reiskapane var merka, noko som kan tyde at ikkje alle er klar over lover og reglar som gjeld. Men det har ein plikt å setje seg inn i. Hummaren er ein truga art, og ulovleg fiske etter den, er miljøkriminalitet, seier Bøe.
Alle ulovlege reiskap som vart funne vert destruerte.
– Målet med aksjonen var å stogge ulovleg fiske, men også å førebyggje. Difor er slike aksjonar viktige, og funna tyder på at dei er heilt naudsynte, seier Bøe.
- Les også:
Fleire titals personar blir no melde for ulovleg hummarfiske. Politiet startar og etterforsking med sikte på å også finne eigarane av det umerka utstyret som vart kverrsett.
– Det blir nok ingen lett jobb sidan det ikkje var merka, og vi er difor interessert i tips frå publikum, seier Bøe.