Bryggeriet lagar fem øl-typar og omsetnaden har vore kring 2 millionar kroner i år.
- Det er tre gonger så stor omsetnad som i fjor, då vi berre selde tradisjonelt øl, seier ølbryggar Evan Lewis.
Han seier salet har gått langt over alle forventningar.
- Eg kunne ikkje tru i byrjinga at det skulle gå så bra, men folk har vore ekstremt positive, seier Lewis.
I balanse alt første året
Det vart investert 10 millionar kroner i det nye bryggeriet i Flåm, og Lewis seier målet var å få drifta i balanse etter tre års tid - men no ser det altså ut til at dei går i balanse alt første året.
Turistar og fastbuande i Flåm og omegn kjem til å drikke 25.000 liter av Lewis sine ølsortar i år - og han er svært nøgd med at dei som tidlegare drakk eitt glas pils, gjerne drikk to av hans øl.
- Folk likar ølet mitt, så dei kjøper meir, seier han.
Tappar på flaske
No når det går mot vinter er det ganske stille i bryggeriet, men neste år satsar Lewis på flaskeomsetnad.
- No kan eg fokusere på å tappe på flaske og få ein avtale med vinmonopol, butikkar, hotell og restaurantar. Vi har hatt etterspurnad frå forskjellige plassar i Sogn og Hordaland, så framtida ser bra ut, seier han.