– Framtida ser usikker ut. Vi veit ikkje om kundegrunnlaget er godt nok, sukkar kapteinen på MF Ole Bull, Atle Remøy.
Brua på Osterøy vart nyleg gratis. Samstundes gjer rushtidsavgifta i Bergen at færre vel å pendle med bil. Alt set kundegrunnlaget til Osterøyferja AS under press.
Får ingen støtte
– Det er opp til ostringane om ferja skal fortsette. Og til politikarane, seier Remøy. Ferja mellom Breistein i Åsane og dei befolkningstunge delene av Osterøy er den einaste i fylket som ikkje får ei krone i støtte.
Tidlegare hadde Osterøy tre ferjesamband. No er det siste i fare. Det er ein tanke som får Ivar Medaas til å snu seg i grava.
Dette meiner NRK om Breistein-Valestrandsfossen:
Overfart og kaiar: 4
Ostringane må unnskylde, men det er ikkje ein veldig interessant tur over fjorden. Valestrandsfossen er jo rett nok fin frå sjøsida. Ingen tilbod på kaiane, men på Osterøy-sida er det butikk i rimeleg gangavstand.
Fartøy: 3
Vi kan avkrefte ryktene om at MF Ole Bull er ein ombygd lekter. Det er berre ei ferge som er bygd for å være så enkel og billig som mogeleg. Det er særs forståeleg, men endrar ikkje at den er stygg som juling. At motorane står oppe på dekk gjer og at det bråker ein del. Ferga har ein heilt grei og teneleg salong på sida.
Service og fasilitetar: 3
To automatar om bord. Eit greit toalett. Ingenting på kaiane.
Nostalgi og oppleving: 3
At dette er siste ferja til Osterøy, og at den er i fare gjev grunn til nostalgi.
Totalt 13 (av 40)